 |
 |
“Azərişıq” ASC istehlakçılara xəbərdarlıq edib.Qurumdan daxil olan məlumata görə, bu gün 91 saylı yarımstansiyada aparılan yenidənqurma işləri ilə əlaqədar Digah və Mehdiabad qəsəbələrinin bəzi ərazilərində saat 12:00-dan 15:00-a qədər elektrik enerjisinin verilməsində qısa müddətli fasilə yaranacaq.
“Azərişıq” ASC yaranmış narahatlığa görə istehlakçılardan üzr istəyir.
İşsizlikdən sığorta ödənişi artıq elektron qaydada təyin ediləcək. Bunun üçün vətəndaşların hansısa quruma vaxt sərf edərək getmələrinə ehtiyac qalmayacaq. Ödənişin təyin edilib-edilməməsi isə 10 gün ərzində bəlli olacaq...
İşsizlikdən sığorta almaq üçün öncədən vətəndaşlar sosial müdafiə şöbələrinə müraciət etməli idilər. Ancaq artıq bütün bu proseslər tam olaraq elektron qaydada icra ediləcək. Bu Əmək və Əhalinin Sosial Müdafiəsi Nazirliyinin "Məşğulluq" altsisteminin təmin etdiyi electron xidmət sayəsində mümkün olacaq.
Ekspert Rəşad Həsənov bildirir ki, işsizlikdən sığorta məsələsinin elektronlaşdırılması çoxsaylı insanın problemini qısa zamanda həll etməyə imkan verəcək.
Nazirlikdən verilən məlumata görə, sığorta ödənişini almaq hüququna malik şəxs "Məşğulluq" altsistemində işsiz kimi qediyyata alındıqdan sonra sistemdə yerləşdirilən ərizəni təsdiq edir. Şəxsin müraciəti altsistem tərəfindən 10 gün ərzində baxılaraq, sığorta ödənişinin təyin edilməsi və ya edilməsindən imtina olunması barədə qərar qəbul edilir. Bu qərar şəxsin elektron kabinetində yerləşdirilir və ya mobil telefon nömrəsinə ismarıc göndərilir.
Rəşad Həsənov bildirir ki, öncədən bu sahədə bir sıra çatışmazlıqlar var idi və buna görə insanların əksəriyyəti işsizlikdən sığorta haqqını əldə edən zaman ciddi çətinliklərlə rastlaşırdılar.
Sığorta ödənişi isə təyin edildikdə şəxsin işsiz kimi qeydiyyata alındığı aydan sonrakı ayın ilk iş günündən hesablanır. Sığorta ödənişinin məbləğinin dəyişdirilməsinə səbəb ola biləcək halların biri baş verdikdə, altsistem tərəfindən 10 gün ərzində baxılaraq sığorta ödənişinin məbləğinin dəyişdirilməsi barədə qərar çıxarılır. Bu barədə də məlumat şəxsin elektron kabinetində yerləşdirilir və mobil telefon nömrəsinə ismarıc göndərilir.
“ATV aktual” verilişinin aparıcısı, tanınmış telejurnalist Ariz Tarverdiyev uzun müddətdir çalışdığı ATV kanalından ayırılıb.
Aparıcının televiziyadan ayırılmasına səbəb "AzerGold" QSC-nin mətbuat katibi vəzifəsinə təyinat alması olub. O bir neçə gündür ki, vəzifəsinin icrasına başlayıb.
Qeyd edək ki, A.Tarverdiyev ATV-də müxbir, xəbər informasiya proqramı və "ATV Aktual" ictimai-siyasi verilişinin aparıcısı olub.
Xatırladaq ki, bir neçə gün öncə televiziya kanalının icraçı direktoru Vahid Səmədov da öz ərizəsilə vəzifəsindən azad edilmişdi.
Bu gündən Azərbaycanın orta məktəblərində payız tətili başlayır.
2019-2020-ci tədris ilinin 5 günlük tətili 16-20 noyabr tarixlərini əhatə edəcək.
Noyabrın 21-də dərs olacaq.
Tədris ilinin 5 günlük qış tətili isə 2020-ci ilin yanvarın 27-də başlayacaq və 31-də bitəcək.
Qeyd edək ki, ümumi təhsil müəssisələrində dərslər sentyabrın 15-də başlayıb və iyunun 14-də başa çatacaq. Tədris ilinin birinci yarımili 15 sentyabr - 26 yanvar, ikinci yarımili 1 fevral - 14 iyunu əhatə edir.
Bakı sakini Əkbər Əliyev Qurban oğlu “Razin tolkuçkası” kimi tanınan Bakıxanov qəsəbəsində yerləşən bazarın rəhbərliyindən şikayətçidir. Şikayətçi problem ilə bağlı müvafiq qurumlara şikayət edib kömək ala bilməyincə, məsələni ictimailəşdirmək üçün “Yeni Müsavat” qəzetinin redaksiyasına gəlib. Ə.Əliyev bildirib ki, onunla birlikdə bazarda fəaliyyət göstərən bir neçə sahibkar da oxşar problem yaşayırlar. Dərdlərinə isə əlac edən yoxdur…
Əkbər Əliyev başına gələnləri aşağıdakı kimi anlatdı: “20 ilə yaxındır ki, “Razin tolkuçkası”nda sahibkar kimi çalışıram. Hazırda bazarda gül mağazam mövcuddur. Bu mağazanı açan zaman bazarda vəziyyət çox pis idi. Qohumlarımın maddi dəstəyi ilə mağazanı qurub, işə başladım. Son zamanlar isə bazarın müdiri Fərhad Mirzəyev sahibkaralara ciddi əziyyət verir. Onlardan biri də mənəm. Sahibkarlar başlarına gələnləri qorxularından ictimailəşdirə bilmirlər ki, onlar bazardan çıxaracaqlar. Lakin mən artıq təngə gəlmişəm. Şikayətim onunla bağlıdır ki, bazarda əlavə pullar yığılır. Bir müddət öncə bizdən 50 manat kabel pulu adı altında vəsait yığdılar. Ötən il də bu adla pul istəmişdilər və vermişdim. Bu il isə dedim ki, eyni adla nə üçün pul yığırsınız və deyilən məbləği verməkdən imtina etdim. Bu zaman Fərhad Mirzəyevin qoçu dəstəsi üstümə hücum çəkib, işığımı kəsdilər. Həmin zaman nə qədər malım xarab oldu. Pulu verdikdən sonra işığımı qoşdular. Sonra yenə də başqa adla pul istədilər. Son illərdə yer pulunu əlavə olaraq yenə də qaldırdılar. Dedim ki, verə bilmirəm. Bazarın rəhbəri dedi ki, buranın ağası mənəm. Nə desəm, o da olacaq. Bu fikirlərə etiraz etdiyimdə isə Fərhad Mirzəyev göstəriş verdi ki, mağazamın elektrik xəttini yenidən kəssinlər. 10 gündür ki, mağazamda işıq yanmır. Elektrik xətti kəsilən gününün səhəri gəldim ki, mağazanın qapısına möhürlənmiş kağız vurublar ki, bazardan çıxmalısan. Sonra məsələni ictimailəşdirəcəyimi söylədiyimdə gəlib kağızı qopardılar. Eyni zamanda Sabunçu Rayon Polis İdarəsinin ərazi üzrə əməkdaşları da mənə çox böyük yardım etdilər. Onlar məsələyə qarışıb, bu cür qapının möhürlənməsinin qanunsuz olduğunu bildirdilər. Tələb etdilər ki, qapı açılsın.
Faktiki olaraq bazar rəhbərliyi sahibkarlara maneə yaratmaqla, cənab prezidentin sərəncamlarına, göstərişlərinə qarşı çıxır. Bizi dinləmədiyi üçün məcbur qalıb. Məsələni ictimailəşdirirəm. Vergini, kommunal xərcləri, icarə haqqını hər zaman vaxtında ödəmişəm. Bundan əlavə hələ bazar rəhbərinin yerinə mağazanı da təmir edib, orada şərait yaratmışam. Bu adam sahibkara dəstək olmursa, niyə köstək olur? Bazarda mənim günümdə olan çox adam var. Bir söz deyəndə qoçularını göndərir ki, Fərhad nə deyirsə, qanundur. Şəxsən mənim qarşımı kəsib deyiblər ki, əgər bu cür danışmağa davam eləsən, səni kriminal dəstənin əlinə verəcəyik”.
Şikayətçi bildirib ki, müdir onları çağırır, bir az gecikən kimi hədələyir: “Deyir ki, bir də gec gəlsən icazə haqqını 50 manat artıracağıq. Hazırda bazarda icarə haqları 100 manat məbləğində rəsmiləşdirilib. Ancaq faktiki olaraq məndən 650 manat alırlar. Cənab prezident bildirir ki, kim sahibkarları incidirsə, mənə məlumat versinlər. Ona görə də qəzet vasitəsilə cənab prezidentdən kömək istəyirəm. Himayəmdə 8 uşaq var. Onlardan ikisinin ata və anası olmadığı üçün qəyyumluğa götürmüşəm. Gəlir yerim yalnız bu mağazadır. Bizi də işləməyə qoymurlar. Çox çətin durumdayıq”.
Məsələ ilə bağlı bazar rəhbərliyinin mövqeyini almağa çalışsaq da, buna nail ola bilmədik. //musavat.com//
Müxtəlif qoşun növlərinin cəlb edilməsi ilə keçirilən əməliyyat təlimi davam edir.
Müdafiə Nazirliyindən "Ölkə.Az"a verilən məlumata görə, təlimin niyyətinə uyğun olaraq Raket və Artilleriya Qoşunlarının bölmələri daimi dislokasiya məntəqələrini həyəcan siqnalı ilə tərk edərək marş icra etmə, cəmləşmə rayonlarına çıxma və digər tapşırıqları yerinə yetiriblər.
Bakı şəhəri Xətai Rayon İcra Hakimiyyətinin başçısı Rafiq Quliyevin əmri ilə evsiz vətəndaşa mənzil verilib.
Bu barədə “Səni axtarıram” verilişinin aparıcısı Xoşqədəm Baxşəliyeva bildirib.
Verilişə müraciət edən Sevinc adlı qadın övladları ilə birlikdə çox çətin şəraitdə yaşayırdı. İcra başçısının bu qərarından sonra Sevinc və övladları normal şəraitli bir evə qovuşacaq.
Xoşqədəm Baxşəliyeva icra başçısına bu addımına görə təşəkkür edib: “Sevincə iki otaqlı ev verildi. Xətai Rayon İcra Hakimiyyətinə, şəxsən rayon icra başcısı Rafiq Quliyevə təşəkkür edirik”.
Qeyd edək ki, Quluyev Rafiq Çəpərxan oğlu 1992-1993-cü illərdə Milli Orduda xidmət edib. Ağdərə uğrunda gedən döyüşlərdə güllə yarası alıb. Müharibə veteranıdır.
Prezident İlham Əliyev 12 noyabr tarixində Azərbaycan Respublikası Konstitusiyasının 124-cü maddəsinin II hissəsini rəhbər tutaraq Rafiq Çəpərxan oğlu Quliyevi Bakı şəhəri Xətai Rayon İcra Hakimiyyətinin başçısı təyin edib.
Sabah Azərbaycan məktəblərində payız tətili başlayır.
"Ölkə.Az"ın məlumata görə, noyabrın 16-dan ümumi təhsil müəssisələrində 2019-2020-ci tədris ili üzrə payız tətili başlayacaq.
“Ümumtəhsil məktəbinin Nümunəvi Nizamnaməsi”nə əsasən, 16-20 noyabrda ümumtəhsil məktəblərində beş günlük payız tətili olacaq.
Məktəblərdə tədris ilinin beş günlük növbəti - qış tətilinin müddəti isə 27-31 yanvarda nəzərdə tutulub.
Qeyd edək ki, 1-5 mayda ibtidai siniflər üçün beş günlük əlavə yaz tətili müəyyən edilir.
Son iki gündə Almaniyadan 11 Azərbaycan vətəndaşı deportasiya edilib.
“Report”un Avropa bürosunun məlumatına görə, onlar Almaniyanın Şimali Reyn Vestfaliya əyalətinin Geseke şəhərində yaşayan Əfran və Ülviyyə Mütəllimovalar, Axen şəhərindən Toğrul Məmmədov, Hamm şəhərindən Azər Əliyev həyat yoldaşı və iki uşağı ilə, Bavariya əyalətindən isə İmran Davudov, Ülviyyə Davudova və onların övladları – 11 yaşlı Fatimə və 9 yaşlı Binnət Davudovalardır.
Azərbaycan vətəndaşları Bayroyt və Düsseldorf hava limanlarından transfer uçuşu vasitəsilə Azərbaycana deportasiya ediliblər.
Onlar sığınacaq istəklərinin geri çevrilməsi ilə bağlı Almaniya Miqrasiya və Qaçqınlarla iş üzrə Federal İdarənin (BAMF) qərarından məhkəməyə dəfələrlə şikayət etsələr də, deportasiyadan xilas ola bilməyiblər.
İmran Davudov, Ülviyyə Davudova və onların övladları – 11 yaşlı Fatimə və 9 yaşlı Binnət Davudovalar
Hər zaman ictimai marağı üstün tutaraq, əhalini narahat edən problemləri obyektiv işıqlandıran KONKRET.az informasiya portalı, bu gün də öz ənənəsini davam etdirir. Bu dəfə redaksiyamıza məktub ünvanlayan Xaçmaz rayon sakini Pərviz Qubadovun problemini araşdırmaq üçün onunla telefon əlaqəsi saxladıq.
Şikayətçi Pərviz Hacı oğlu Qubadov 1982-ci ildə anadan olub. 6 nəfər ailə üzvü olan Pərviz bildirdi ki, səhhəti ilə bağlı heç yerdə işləmədiyindən dolanışığı çox çətindir. Ona görə də, ünvanlı sosial yardım almaq üçün aprel ayından elektron formada müraciət etsə də, bugünədək heç bir cavab almayıb.
Şikayətçinin sözlərinə görə, 2016-2018-ci illərdə dövlət tərəfindən ona sosial yardım verilib. 2 il ünvanlı sosial yardım alıb. Lakin bu ildən Pərviz Qubadov ünvanlı sosial yardımdan məhrum edilib. Səbəb kimi isə həyat yoldaşının adına dövlət tərəfindən verilən pay torpağının olması göstərilib.
Şikayətçi deyir ki, torpağın hökumət tərəfindən verildiyini , əlində bunu təsdiq edən aktın olduğunu bildirsə də, onun sözlərinə məhəl qoyan yoxdur. Pərviz Qubadovdan yeni akt gətirməsi tələb olunub və şikayətçi iddia edir ki, bunun üçün ondan 400-500 azn civarında pul tələb edilib.
Şikayətçi bildirir ki, imkanı olmadığından bu məbləği verə bilməyib. Elə ona görə də yeni akt almayıb. Nəticədə isə sosial yardım almaq hüququndan məhrum edilib.
Pərviz Qubadov deyir ki, dəfələrlə gəlib yaşadığı yeri çəkib, onun şəraiti ilə tanış olublar. Lakin buna baxmayaraq elektron müraciətinə rədd cavabı verilir.
Mövcud problemlə əlaqədar Dövlət Sosial Müdafiə Fondunun Xaçmaz Rayon Şöbəsinin müdiri Ceyhun Həmidovla əlaqə saxladıq. Şöbə müdiri saytımıza açıqlamasında bildirdi ki, rəhbərlik etdiyi idarədə vətəndaşlardan heç bir sənəd istənilmir. Hər şey elektron müraciətlə həll olunur.
Ceyhun Həmidov bildirdi ki, vətəndaş elektron formada müraciət etdikdən sonra , onun adı siyahıya düşür. Daha sonra vətəndaşın maddi-məişət şəraitinin yoxlanılması həyata keçirilir. Bundan sonra isə akt yazılır və həmin akta uyğun olaraq bütün məlumatlar sistemə daxil edilir. Əgər yazılan aktla, sistemdəki məlumatlar üst-üstə düşərsə, o zaman təyinat verilir.
Qurum rəsmisinin sözlərinə görə, vətəndaşın daxil etdiyi məlumatlar tam düzgün olmalıdır. Əks halda şöbə tərəfindən vətəndaşın maddi-məişət şəraiti yoxlanılarkən, məlumatlar uzlaşmayacaq və sosial yardımın verilməsində problemlər yaranacaq.
Odur ki, vətəndaş torpağın SUN (sığorta uçot nömrəsini) nömrəsini almalıdır. Bunun üçün yerli vergi idarəsinə müraciət olunmalı və sun nömrəsi alınmalıdır. Daha sonra müraciət edərkən həmin torpaq payını sistemdə göstərməlidirlər.
Ceyhun Həmidovun sözlərinə görə, torpağın mülkiyyətçisi dünyasını dəyişməyibsə, o zaman yeni akt almağa ehtiyac yoxdur. Sonda Ceyhun Həmidov bildirib ki, şikayətçini dinləməyə və qanuni proseduru izah edib, hər cür yardım göstərməyə hazırdır. Biz də ümid edirik ki, vətəndaşın şikayəti yerindəcə araşdırılacaq və məsələ öz müsbət həllini tapacaq.