 |
 |
Gələn il yanvarın 1-dən uşaqların zərərli informasiyadan qorunması haqqında qanunvericiliyin pozulmasına görə 500 manatdan 4000 manatadək cərimə tətbiq ediləcək.Bu məsələ Prezident İlham Əliyev tərəfindən yeni təsdiqlənən İnzibati Xətalar Məcəlləsində öz əksini tapıb.
Məcəlləyə edilən yeni əlavəyə əsasən, uşaqlar arasında dövriyyəsi qadağan edilən informasiya məhsullarının uşaqların ola biləcəyi yerlərdə inzibati, texniki proqram və avadanlıq vasitələri tətbiq edilmədən yayılmasına, yaşa görə təsnifatlaşdırılmasını təmin etmədən, o cümlədən müəyyən edilmiş hallar istisna olmaqla informasiya məhsulunu müvafiq yaş kateqoriyasına uyğun işarələmədən ölkə ərazisində yayılmasına, informasiya məhsulunun yayımçıları tərəfindən televiziya yayımı, kino və video xidmətlərinin göstərilməsi zamanı hər bir informasiya məhsulunun nümayişindən əvvəl xüsusi kadrda (səhifədə) informasiya məhsulunun yaş kateqoriyasına uyğun işarəsinin və yaş məhdudiyyəti barədə, o cümlədən internet informasiya ehtiyatlarında informasiya məhsulunun uşaqlar arasında yayılmasını məhdudlaşdıran xəbərdarlığa dair mətnin yerləşdirilməməsinə görə fiziki şəxslər 500 manatdan 1000 manatadək məbləğdə, vəzifəli şəxslər 1500 manatdan 2000 manatadək məbləğdə, hüquqi şəxslər 3000 manatdan 4000 manatadək məbləğdə cərimələnəcəklər.
Eyni zamanda, "18+” yaş kateqoriyasına aid informasiya məhsulu teleradio vasitəsilə yayımlanarkən bu informasiya məhsulunun yaş kateqoriyası haqqında xəbərdarlığı televiziya yayımı zamanı işarə, radio yayımı zamanı isə səsləndirmə ilə həyata keçirilməməsinə, uşaqlar üçün nəzərdə tutulan informasiya məhsullarında (telekommunikasiya şəbəkələri, o cümlədən internet şəbəkəsi vasitəsilə yayılan informasiya məhsulları və sellülar (mobil) rabitə şəbəkəsi də daxil olmaqla) onların zərərli informasiya məhsulunun hazırlanmasına cəlb edilməsi barədə elanların yerləşdirilməsinə, məhdud şəxslər dairəsində yayılması nəzərdə tutulan mətbu nəşrin birinci və sonuncu səhifəsində, çap məhsulunun və digər poliqrafik məhsulun üz və arxa qabığında uşaqlar arasında dövriyyəsi qadağan edilən informasiyanın əks olunmasına və ya həmin informasiya məhsulunun qablaşdırmadan yayılmasına görə eyni məbləğdə cərimə tətbiq ediləcək.
Bununla yanaşı, uşaqlar arasında dövriyyəsi qadağan edilən informasiya məhsulunun uşaqlar üçün nəzərdə tutulmuş təhsil müəssisələrində, tibb, sanatoriya-kurort, bədən tərbiyəsi və idman, mədəniyyət, istirahət və sağlamlaşdırma müəssisələrində və ya həmin müəssisələrin sərhədindən 150 metrdən az olan məsafədə yayılmasına görə də fiziki şəxslər 500 manatdan 1000 manatadək məbləğdə, vəzifəli şəxslər 1500 manatdan 2000 manatadək məbləğdə, hüquqi şəxslər 3000 manatdan 4000 manatadək məbləğdə cərimə ediləcəklər.
Ağstafa Rayon İcra Hakimiyyətinin başçısı Nizaməddin Quliyev və onun müavini Ramiz Tatarovun müxtəlif şəxslərdən müxtəlif adlar altında pul vəsaitləri tələb edərək almağa görə Dövlət Təhlükəsizliyi Xidməti tərəfindən həbs edildi.Həmçinin 2019-cu ilin noyabr ayınadək Yevlax Şəhər İcra Hakimiyyətinin başçısı vəzifəsində işləmiş Qoca Səmədov da çoxsaylı qanun pozuntularına yol verdiyinə görə saxlanılıb.
Ard-arda baş verən həbslər cəmiyyətdə və sosial şəbəkələrdə geniş müzakirələrə səbəb olub.
"Report" bu cür xəbərlərin paytaxt sakinləri tərəfindən necə qarşılanması və onların məsələyə münasibəti ilə bağlı sorğu keçirib.
Sabah Azərbaycana qış fəsli daxil olacaq.
Axar.az xəbər verir ki, qış fəsli ölkəyə dekabrın 22-də Bakı vaxtı ilə saat 08.19-da qədəm qoyacaq.
Bu zaman Yerin fırlanma oxu Günəş istiqaməti ilə ən böyük bucaq əmələ gətirəcək və ya Günəş həmin an üfüqdən minimum hündürlükdə olacaq. Həmin gün ən qısa gündüz, ən uzun gecə qeydə alınacaq.
Dekabrın 17-də Səbail RPİ-nin 9-cu Polis Bölməsinə müraciət edən Botsvana Respublikasının vətəndaşı Mfo Kqasvane pulunun oğurlanmasını bildirib.
Daxili İşlər Nazirliyindən Axar.az-a verilən məlumata görə, araşdırmalarla müəyyən edilmişdir ki, həmin gün saat 17 radələrində N.Rəfibəyli küçəsində 2 azyaşlı ona yaxınlaşıb, sonradan isə o, cibindəki 15 manat və 500 ABŞ dollarının oğurlanmasını aşkar edib.
Keçirilmiş əməliyyat-axtarış tədbirləri nəticəsində oğurluğu törətməkdə şübhəli bilinən Yevlax rayon sakinləri olan 2 azyaşlı qız Bakı şəhər Baş Polis İdarəsinin əməkdaşları tərəfindən müəyyən edilərək saxlanılıblar.
Araşdırma aparılır.
İllərdir toyuq dönərinin ziyanlarından danışılsa da, zəhərlənmə faktları olsa da, nədənsə hələ də bu qidaya maraq azalmır. Əsasən, universitetlərin yanında fəaliyyət göstərən dönərxanaların müştəriləri isə daha çox tələbələrdir.
Mələsə ilə bağlı ARB TV-nin “Günə Doğru” proqramında geniş süjet yayımlanıb.
“Toyuq dönəri xoşladığım üçün onu alıram”, – tələbələrdən biri deyib.
Ekspertlərin sözlərinə görə, istehlakçılar dönər alarkən, diqqətli olmalıdır.
“İstehlakçı isitfadə olunan toyuq dönəridirsə, toyuq ətidirsə, ətin mənşəyi sertifikatını tələb etməlidir”, – qida mühəndisi İsa Əliyev qeyd edib.
Dönər satanlar israrla bu iş üçün müvafiq qurumlardan icazələrinin olduğunu bildirirlər. Amma icazə ilə bağlı sənədi istəyəndə cavab tapmaqda çətinlik çəkirlər. Eyni zamanda, dönərdə istifadə olunan toyuğu haradan və nə vaxt aldıqlarını göstərən sənəd də yoxdur.
“Hazırda satılan toyuğun istifadə tarixi ilə bağlı sənəd gəlib, amma axşam növbəsində olan işçi harasa qoyub, yerini bilmirəm”, – satıcılardan biri bildirib.
Xatırladaq ki, bü günlərdə Gəncədə dönərxanalara yararsız toyuq əti paylayan müəssisənin fəaliyyəti aşkar edilib.
Qida Təhlükəsizliyi Agentliyi isə vətəndaşlara mənşəyi məlum olmayan yerlərdən dönər almamağı tövsiyyə edir. Əgər istehlakçıların hər hansı şübhələri olarsa, bu barədə Agentliyin 1003 çağrı mərkəzinə məlumat verə bilərlər.
Dövlət Təhlükəsizlik Xidmətinin keçirdiyi əməliyyat nəticəsində saxlanılan Ağstafanın sabiq icra başçısı Nizaməddin Quliyevin ailə üzvləri də vəzifəli şəxslərdir.
“Qafqazinfo”nun əldə etdiyi məlumata görə, N.Quliyevin bir oğlu Ramin Quliyev Nərimanov rayon məhkəməsinin hakimidir. Məlumata görə, R.Quliyev 1978-ci ildə anadan olub. 2001-ci ildə hüquq sahəsində fəaliyyətə başlayıb. İlk olaraq 6 il Bakı Apelyasiya Məhkəməsində, sonra isə 3 il Suraxanı rayon məhkəməsində katib işləyib. Növbəti 3 il ərzində isə Ali Məhkəmədə nəzarətçi olub. 2013-cü ildən Nərimanov rayon məhkəməsində hakim işləyir. 
Digər oğlu Ramal Quliyev isə Baş Prokurorluğun Korrupsiyaya Qarşı Mübarizə Baş İdarəsində müstəntiqdir. O, bir müddət əvvəl banklardan birinin Mingəçevir şöbəsində rəhbər vəzifə tutub. Ramal Quliyevin adı da atası kimi mətbuatda mütəmadi hallanıb. Belə ki, Xalq artisti Aygün Kazımovanın qızı İlqarənin bir neçə il əvvəl yayılan videosunda Ramal Quliyev də olub.
Sabiq başçı Nizaməddin Quliyev Goranboy rayonunda rəhbər olanda oğluna görə sahibkarlarla da problemi olub.
Həmin zaman mətbuat səhifələrində yayılan məlumata görə, N.Quliyevə rayonda abadlıq işlərini tanınmış biznesmen Müqayis Verdiyevə gördürüb. Bu iş üçün sahibkarın 256 min manat xərci çıxsa da, başçı ona cəmi 100 min qaytarıb. M.Verdiyev qalan 156 min manatı almaq üçün bəzi qurumlara mətbuata müraciət etdikdən sonra onun başçı ilə münasibətləri pozulmuşdu. Daha sonra N.Quliyevin şirkətinin adından edilən dələduzluqla bağlı şikayəti əsasında iş adamı M.Verdiyev həbs edilsə də, sonradan məhkəmədə bəraət alaraq azadlığa buraxılmışdı.
İddiaya görə, N.Quliyevin oğlu Ramal bankda işləyərkən yarım milyonluq yeyintiyə yol veribmiş və bu zərərin ödənməsində başçıya goranboylu sahibkar M.Verdiyev maddi yardım edib. Daha sonra Ramalın ölkədən qaçdığı barədə məlumatlar yayılmışdı.
R.Quliyev isə bu barədə açıqlama verərək təkzib etmişdi:
“Nə mən, nə də atam heç bir qanunsuz addım atmamışıq, heç atmarıq da. Heç bir adam hamı üçün yaxşı ola bilməz. Öz işimdəyəm və heç bir yerə qaçmamışam. Heç bir problem də yoxdur. Heç kimin haqqını yeməmişəm, yemərəm də.Yazıblar ki, guya atam məni xaricə qaçırdıb, pulları hansısa müğənniyə xərcləmişəm. Mənə qaranlıq qalıb ki, belə yalan xəbərləri haqqımda nə üçün yayırlar? Bir insafları olsun, Allah var başımız üstündə”.
Bu işlə bağlı istintaq davam edərkən vəkil Adəm Məmmədov da Ramal Quliyevin İlqarə Kazımova ilə olan münasibəti barəsində açıqlama yaymışdı. Nizaməddin Quliyevin bu yazıdan Vəkillər Kollegiyasına verdiyi şikayəti əsasında A.Məmmədov cəzalandırılmışdı.
Xəbər verdiyimiz kimi, Dekabrın 19-da Azərbaycan Respublikasının Prezidenti İlham Əliyevin yanında pambıqçılıq mövsümünün yekunları və 2020-ci ildə görüləcək tədbirlər ilə bağlı müşavirə keçirilib.
Müşavirədə “MKT İstehsalat Kommersiya” MMC-nin baş direktoru Rövşən Həsənov çıxış edərkən yalnışlığa yol verib. Belə ki, o “Avstraliya” əvəzinə “Avstriya” deyib. Prezident isə onun sözünü kəsərək səhvini düzəldib.
Həmin görüntünü təqdim edirik:
(metbuat.az)
Şəmkir Rayon İcra Hakimiyyətinin başçısı Alimpaşa Məmmədov 1992-ci ildə Laçın rayonu uğrunda gedən döyüşlərdə şəhid olmuş Cəfərov Tofiq Məhərrəm oğlunun məzarını ziyarət edib, ailəsinə baş çəkib.
"Ölkə.Az" xəbər verir ki, görüş zamanı icra başçısı şəhid ailəsinin problemləri ilə maraqlanıb.
Alimpaşa Məmmədov ölkə başçısı İlham Əliyevin şəhid ailələrinə diqqət və qayğısından danışıb, şəhid ailələrinin sosial vəziyyətinin və maddi rifahının yaxşılaşdırılması ölkə başçısının yürütdüyü siyasətin əsas istiqamətlərindən biriolduğunu bildirib.
İcra başçısı şəhidin ailə üzvləri - atası Cəfərov Məhərrəm Qədir oğlu, anası, Şəmkirdə yaşayan azsaylı xalqların nümayəndəsi olan Cəfərova Lyuda Feafovna ilə söhbətləşib. Görüş zamanı Alimpaşa Məmmədov şəhid anasının əlini öpməsi diqqətlərdən qaçmayıb.
Qeyd edək ki, son aylarda Prezident İlham Əliyev icra hakimiyyətlərində kadr islahatlarını sürətləndirib, icra başçılarına əhalinin qayğıları ilə yaxından maraqlanmağı, onların problemlərini həll etməyi, korrupsiya və rüşvətxorluğun qarısını almağı tapşırıb.
Ölkə başçısı işini düzgün yerinə yetirməyənlərin cəzalandıacağını da bildirib. Artıq bu istiqamətdə işlər də həyata keçirilib. Belə ki, Ağstafanın hazırkı, Yevlaxın isə keçmiş icra başçısı korrupsiya və rüşvətxorluğa görə saxlanılıb. Prezident dünən keçirdiyi müşavirədə xəbərdarlığını yeniləyib və hər kəsi işini düzgün yerinə yetirməyə çağırıb.
Ağaqardaş Qaraşov: “Qurumuş ağacların yenidən bərpası mümkün deyil, belə ağaclar həm də yanğın üçün şərait yaradır”
Ölkə üzrə kütləvi ağacəkmə kampaniyası keçirilir. Kampaniya cəmiyyətdə xoş qarşılandı, böyük dəstək aldı. Amma…
Ara-sıra paytaxt və bölgələrdə kimlərinsə özbaşına ağacları kəsdikləri barədə xəbərləri də yayılır. Bugünlərdə AYNA-ya növbəti belə bir məlumat və fotolar da daxil oldu.
Şəkidən göndərilən məlumatda qeyd olunur ki, rayonun Kiş kəndi yaxınlığındakı meşəlikdə (oraya “Şam bağları” da deyilir) xeyli sayda ağac kəsilib. Kəsilmiş ağac kötükləri şəkillərdə də əks olunur.
Məsələ ilə bağlı Ekologiya və Təbii Sərvətlər Nazirliyinin (ETSN) Meşələrin inkişafı departamentinin direktoru Ağaqardaş Qaraşov AYNA-ya bildirib ki, ağacların kəsilməsi özbaşına deyil: “Bir neçə aydır ki, həmin ərazidə qiymətləndirmə aparılır, meşənin qurumuş ağacları qanuna müvafiq olaraq kəsilir. Hətta kəsilən ağaclara diqqətlə baxılsa, onlarda nömrələnmə aparıldığı görünər. Buna sanitar təmizlənmə deyirlər”.
“Aparılan təmizlənmə nəticəsində meşədə sağlam ağacların inkişafına əngəl olan yararsız ağaclar kəsilir. Tamamən qurumuş ağacların yenidən bərpası mümkün deyil. Belə ağaclar həm də yanğın üçün şərait yaradır, məsuliyyətsiz birinin atdığı siqaret kötüyündən meşədə yanğın çıxa bilər”, – ETSN rəsmisi deyib.
A.Qaraşov əlavə edib ki, kəsilmiş ağaclar oduncaq kimi ehtiyacı olan vətəndaşlara və hərbi hissələrə verilir: “Həmin ərazilərdə ağacların kəsilməsi ilə bağlı bir neçə dəfə müraciət olunub. Bir məsələ var ki, Bakıdan gedən adam heç vaxt meşədən ağac kəsə bilməz, ağacı kəsən adam ya meşəbəyi olar, ya da hansısa yerli sakin, kənd adamı. Əsasən qış vaxtı odundan yanacaq kimi istifadə etmək üçün kəsilir. Amma biz həmin yerlərdə olan işçilərimizdən də ayıq-sayıqlıq tələb edirik”.
Nazirliyin İctimaiyyətlə əlaqələr şöbəsinin rəhbəri İradə İbrahimova isə AYNA-ya açıqlamasında qeyd edib ki, son vaxtlar müşahidə olunan ictimai nəzarət onları da məmnun edir: “Təkcə bu il ərzində vətəndaşlarımızdan xeyli şikayət, narazılıqlar almışıq. Məhz bu əlbirliyi sayəsində Nazirlik tərəfindən qanunsuz hasarlanan ağaclıq, özbaşına kəsilən ağaclarla bağlı ölçü götürülüb”.
“Hər ağacın yanında kimisə nəzarətçi qoymaq mümkün deyil. Bu səbəbdən vətəndaşlar belə hallar gördükdə dərhal ərazi üzrə Nazirliyin idarələrinə və ya birbaşa bizə müraciət edə bilərlər. Nazirliyin 168 saylı “qaynar xətt”i vətəndaşların ixtiyarındadır”, – İbrahimova vurğulayıb.
Azərbaycanda bələdiyyə seçkiləri ilə əlaqədar gələn həftənin bazar ertəsi - dekabrın 23-ü qeyri-iş günüdür.
"Ölkə.Az"ın apa-ya istinadən xəbərinə görə, Seçki Məcəlləsinin 8-ci maddəsinin (Seçkilərin (referendumun) təyin edilməsi müddəti) 2-ci bəndinə əsasən, səsvermə günü seçki (referendum) keçirilən ərazidə iş günü hesab olunmur.
Səsvermə günü Azərbaycan Respublikasının Əmək Məcəlləsinə görə ümumxalq hüzn və ya iş günü hesab edilməyən bayram gününə düşərsə (Azərbaycan Respublikası Konstitusiyasının 84-cü maddəsinin II hissəsində nəzərdə tutulan hal istisna olmaqla), səsvermə səsvermənin keçirilməli olduğu ayın başqa iş gününə təyin edilir.
Bələdiyyə seçkiləri respublika üzrə keçirildiyindən dekabrın 23-ü qeyri-iş günüdür.