 |
 |
Bu gün Abşeron rayonunun Xırdalan şəhərinə içməli suyun verilməsində məhdudiyyətlər olacaq.
Bu barədə "Ölkə.Az"a “Azərsu” ASC-dən bildirilib.
Məlumata görə, buna səbəb şəhərdə yeni yaradılmış içməli su təchizatı infrastrukturunun şəbəkəyə qoşulmasıdır.
Qurum yaranacaq narahatlıqla əlaqədar abunəçilərdən üzr istəyib.
Azərbaycan Respublikasının İpoteka və Kredit Zəmanət Fondu (Fond) bildirir ki, 22 yanvar 2020-ci il il tarixində satmaq öhdəliyi ilə kirayə mexanizmi üzrə müraciətlərin qəbulu ilə bağlı “Elektron ipoteka və kredit zəmanət” sistemində yaranmış texniki problemlərlə bağlı bir sıra kütləvi informasiya vasitələrində “elektron sistemin çökməsi” başlığı altında yayılan məlumatlar həqiqəti əks etdirmir.
Fondun mətbuat xidmətindən "Ölkə.Az"a verilən məlumata görə, əhaliyə xidmət səviyyəsinin yüksəldilməsi, ipoteka kreditlərinə çıxış imkanlarının genişləndirilməsi, müraciətlərin qəbulu və qiymətləndirilməsi prosesində növbəliliyin və şəffaflığın təmin edilməsi, qarşılıqlı təmas və sui-istifadə hallarının qarşısının alınması, sənəd dövriyyəsinin optimallaşdırılması və minimuma endirilməsi, xidmət prosesinin sürətləndirilməsi məqsədilə müvafiq elekton sistem 2013-cü ildən etibarən tətbiq olunur.
Qeyd olunub ki, Azərbaycan Respublikası İpoteka və Kredit Zəmanət Fondunun yaradılması və Fondun Nizamnaməsinə uyğun olaraq Fondun qarşısına yeni vəzifələrin qoyulması ilə əlaqədar olaraq yeni “Elektron ipoteka və kredit zəmanət” sistemi (Elektron sistem) yaradılıb və 19 iyun 2019-cu il tarixindən əhalinin və Fondun müvəkkil təşkilatlarının (banklar, sığortaçılar və qiymətləndircilər) istifadəsinə verilib.
"Elektron sistem müasir texnoloji platforma və bulud texnologiyaları üzərində qurulub və hazırda Fondun müxtəlif fəaliyyət istiqamətləri üzrə kifayət qədər geniş və mürəkkəb funksionallığa malik əməliyyatların avtomatlaşmasını təmin edən unikal bir sistemdir.
Belə ki, elektron sistem müraciət edən şəxslərin şəxsiyyətini təsdiq edən sənəd, nikah və ailə tərkibi, iş yerini və gəlirlərinə, sosial sığorta ödənişlərinə, vergi öhdəliklərinə, kredit tarixçəsinə və ipoteka qoyulan daşınmaz əmlaka dair məlumatların elektron qaydada əldə edilməsi üçün “Elektron hökumət” portalına inteqrasiya olunub və müvafiq dövlət qurumlarının informasiya sistemlərindən (Daxili İşlər Nazirliyi, Ədliyyə Nazirliyi, Əmək və Əhalinin Sosial Müdafiəsi Nazirliyi, “Azərbaycan Kredit Bürosu” MMC, Dövlət Vergi Xidməti, Əmlak Məsələləri Dövlət Xidməti və digər) və ehtiyatlarından tələb olunan məlumatların bu sistemə ötürülməsi imkanı təmin edilib. Nəticədə, Fondun təqdim etdiyi xidmətlər üzrə ölkə vətəndaşları tərəfindən kağız daşıyıcılarında təqdim edilən sənədlərin sayının minimal həddə çatdırılması və xidmət səviyyəsinin yüksəldilməsi təmin edilib.
Elektron sistem təkcə əhalinin müraciətlərinin qəbulunu və qiymətləndirilməsini deyil, ümumilikdə Fond ilə müvəkkil təşkilatlar (banklar, sığorta şirkətləri və qiymətləndiricilər) arasında aparılan maliyyə əməliyyatlarının və rəsmi yazışmaların avtomatlaşdırılmasını da təmin edir.
Bununla yanaşı, Fondun vəsaiti hesabına verilən ipoteka kreditləri üzrə annuitet, sığorta və ipoteka kreditlərinə verilmiş zəmanət haqlarının ödənişlərinin real rejimdə aparılması üçün Elektron sistem Hökumət Ödəniş Portalı və “ASAN ödəniş” sistemlərinə də inteqrasiya olunub.
Məlum olduğu kimi, 22 yanvar 2020-ci il tarixində satmaq öhdəliyi ilə kirayə mexanizmi üzrə müraciətlərin kütləviliyi sistemin işində donma və ləngimələrə gətirib çıxarıb və əksər vətəndaşların müraciətlərin göndərilməsində çətinlikləri müşahidə olunub. Qeyd etmək istəyirik ki, müraciətlərin qəbulu zamanı yaranmış texniki problem bütövlükdə sistemin fəaliyyəti ilə deyil, yalnız vətəndaşların istifadəsinə verilmiş yeni modulla əlaqədar olub.
Bununla əlaqədar vətəndaşların müraciətləri üzrə ədalətli növbəliliyin və bərabər imkanların təmin edilməsi üzrə müraciətlərin qəbulu müvəqqəti dayandırılıb və heç bir müraciət qeydə alınmayıb. Bildiririk ki, hazırda “Elektron ipoteka və kredit zəmanət” sisteminin ipoteka kreditləri ilə bağlı hissəsi tam işlək vəziyyətdədir və Fond ilə müvəkkil təşkilatlar arasında əməliyyatların real rejimdə davam etdirilməsini tam təmin edir.
Yekun olaraq, vətəndaşlarımızdan və kütləvi informasiya vasitələrindən baş vermiş texniki problemlə bağlı məsələyə anlayışla yanaşılmasını xahiş edir və bildiririk ki, ən qısa müddət ərzində satmaq öhdəliyi ilə kirayə mexanizmi ilə bağlı müraciətlərin qəbulu prosesinə başlanılacaq".
Müasir tibbin bu qədər inkişaf etdiyi bir dövr olmasına baxmayaraq, hələ də xüsusilə azyaşlı övladlarını çöpçü yanına aparan valideynlər kifayət qədərdir.
Qədim dövrlərdən bu günə kimi gəlib çatan bu ənənəyə görə, əgər uşaqda yüksək hərarət, qusma və bu kimi əlamətlər varsa və buna həkim də kömək edə bilmirsə, demək ki, hökmən çöpçü yanına aparmaq lazımdır.
Bəs tibbin qəbul etmədiyi, müəyyən işbazların uydurduqları ənənə adlandırılan çöpçülük doğrudan da müalicə üsuludurmu?
Məsələni araşdırmaq üçün paytaxt ərazisində fəaliyyət göstərən çöpçülərin məkanlarına yollandıq. Suallarımıza cavab almaq məqsədilə ona yaxın qapı döysək də, demək olar, onundan doqquzu qapını üzümüzə bağladı. Xeyli söhbət etdikdən sonra isə nəhayət ki, bir çöpçü xanım qısa olaraq məşğul olduğu işlə bağlı danışmaq qərarına gəldi. Uzun müddət ərzində çöpçülük fəaliyyəti ilə məşğul olan xanım bildirdi ki, tibb inkar edə bilər amma fakt olan odur ki, çöpçülük həqiqi müalicə üsuludur. Müsahibimiz bildirir ki, hətta bir çox həkimlər xəstələri özləri bizə yönləndirirlər.
Çöpçü xanım onu da əlavə etdi ki, çöp yalnız uşaqlarda olmur. Kifayət qədər yaşlı insanlar da var ki, çöp çıxarmaq üçün müraciət edirlər.
Söhbətimiz əsnasında buraya gələn müştərilər ilə də həmsöhbət olduq. Valideynlər bildirirlər ki, uşaqlarını bura gətirdikdən sonra xəstəlikləri tamamilə sağalıb. Hətta çöpü qalan uşağı həkimə göstərməyi mənasız hesab etdilər.
Həkim-terapevt Nahid Məhərrəmov isə nə çöpçülərin, nə də onların yanına gələn valideynlərin dedikləri ilə qətiyyən razılaşmadığını bildirir. Həkim deyir ki, dünyanın heç bir yerində belə müalicə üsulu yoxdur. Həkim çöpçülüklə məşğul olanların sadəcə sehrbaz olduqlarını bildirdi.
Aydın olan isə odur ki, illər keçsə də, hələ də çöpçüyə müraciət edənlərin sayında azalma yoxdur. Ən azından bunu çöpçülərin qapısının ağzında olan növbədən açıq-aydın görmək mümkündür. (oxu.az)
Bərdə 93 saylı seçki dairəsindən deputatlığa namizədliyini vermiş Xəyalə Əhmədovanı ata-baba yurdunda- Hacallı kəndində bir başqa coşğu ilə qarşıladılar.
İpoteka və Kredit Zəmanət Fondu tərəfindən kirayə mənzil mexanizmi çərçivəsində vətəndaşlara təklif olunacaq mənzillərin aylıq ödənişi açıqlanıb.Açıqlamada bildirilir ki, evlərin qiyməti Bakıda 411 manatdan, Xırdalanda 333 manatdan, Sumqayıtda isə 297 manatdan başlayacaq.
Həmçinin ilkin mərhələdə həmin evlərin yerləşdiyi ərazi, onların sayı və sahəsi barədə məlumat verilib. Məlumata görə, satmaq öhdəliyi ilə 331 mənzil kirayəyə veriləcək. Mənzillərin 208-i Bakı şəhəri, Nizami rayonu, M.Abbasov küçəsində, 40-ı Bakı şəhəri, Xətai rayonu, Gəncə prospektində, 58-i Abşeron rayonu, Xırdalan şəhəri 21-i məhəllədə və 25-i Sumqayıt şəhəri, Sülh küçəsində yerləşir.
Bildirək ki, bu gün səhər saat 10:00-dan etibarən bu mənzillər üzrə elektron müraciətlərin qəbuluna başlanılıb.
Məlumdur ki, bu layihəyə sosial layihə kimi start verilmişdi. Yəni sözdə imkanı aşağı olan insanların ev sahibi olmalarına şərait yaradılacaqdı. Lakin hazırda açıqlanan qiymətlər isə səsləndirilən fikirlərin əksini təsdiqləyir, çünki Bakı üçün təyin olunan minimum qiymət - 411 manat aztəminatlı ailələrin aylıq gəlirlərinə uyğun gəlmir. Bakıda işləyən, minimum əməkhaqqı alan, kirayədə yaşayan ailələrin ailəvi xərclərini də nəzərə alsaq, bu ödənişi həyata keçirməsi müşkül məsələdir. Əksər kirayədə qalan ailələr yaşadıqları ev üçün 250-300 manat ödəyirlər.
Bəs görəsən iqtisadçılar nə deyir? Müəyyən olunan qiymət qaneedicidirmi?
İqtisadçı-ekspert Natiq Cəfərli məsələ ilə bağlı Cebhe.info-ya açıqlama verərək bildirib ki, qiymətlər heç də qaneedici deyil. Qiymətlərin yuxarı həddinin minimum əməkhaqqı, yəni 250 manat səviyyəsində olması daha məntiqli olardı. Amma görünür, məsələyə ciddi yanaşılmayıb:
“Bu hələ ilkin qiymətlərdir. Bundan yuxarı qiymətlər də var. Aylıq ödənişi 596 manat olan mənzillər də təklif olunur. Bu layihə ilk dəfə elan olunan zaman sosial bir layihə kimi səsləndirilmişdi və deyilmişdi ki, faiz də olmayacaq. Amma indi məlum olur ki, faizlər lap əvvəldən hesablanaraq qiymətlərin üzərinə əlavə olunub. Ona görə də həm ilkin ödənişlər, həm aylıq ödənişlər çox yüksəkdir. Bundan başqa, müqavilədə fors-major situasiyalarda, məsələn, manatın dəyərdən düşməsi, devalvasiya, infilyasiya və s. bütün bu hadisələr zamanı qiymətlərin dəyişməz qalacağı əks olunmayıb. Qiymətlər indeksləşdirilə bilər. Bunlar fiksə olunmuş qiymətlər deyil, yenidən bahalaşa bilər. Manatla bağlı hansısa proses baş versə, qiymətlərin dəyişməsini açıq şəkildə müşahidə edəcəyik. Bu nöqteyi-nəzərdən ilkin olaraq bu layihənin başlanğıcını elan olunmuş sosial layihə kimi görmədik. Nə dünya təcrübəsi öyrənilib, nə buna yaxşı hazırlıq görülüb. Cəmi 300-dən biraz yuxarı mənzillər satışa çıxarılıb. Artıq onlayn qeydiyyatla bağlı göstərilən ünvana daxil olmaq belə mümkün deyil. Mexanizmi də hazırlanmayıb, sayt çox zəifdir və müraciətlərin çoxluğunu nəzərə alaraq demək olar ki, sayt çöküb”.
Ekspert diqqətə çatdırıb ki, bu tipli layihələrə öncədən çox ciddi hazırlaşmaq lazımdır. Həm sosioloji, həm iqtisadi əsaslandırılması aparılmalıdır:
“Mənzil problemi tək iqtisadi məsələ deyil, həm də sosial məsələdir. Mənzil probleminin olması ailələrin bir çox hallarda boşanmasına səbəb olan əsas fatorlardan biridir. Burada ciddi hazırlıqlar, müzakirələr aparılmalı, yol xəritəsi hazırlanmalı idi və bundan sonra bu layihəyə start verilsə, daha məntiqli olardı. Bu məsələyə hazırlıqsız start verildi , sanki piyar, kampaniya xarakterli məsələ kimi təqdim olunur. Əslində isə sosial layihə olmalı idi və doğrudan da aztəminatlı, gənc ailələrin mənzillərə çıxış imkanlarını genişləndirməyə hesablanmalı idi. Dünya təcrübəsi, qonşu ölkələrin təcrübəsi bu anlamda öyrənilməyib”.
Qeyd edək ki, iqtisadçı-ekspert Rəşad Həsənov da sosial şəbəkədə məsələyə münasibət bildirərək sözügedən evlərin heç də sərfəli olmadığını vurğulayıb. Onun sözlərinə görə, Sumqayıtda Baxça Şəhərdə evlərin kvadratı 1800 manatdan hesablanır, sonra 25 ilə bölünür və 105 kvadrat evin aylığı 630, 90 kvadrat 540, 78 kvadrat 468 68 kvadrat evin aylığı isə 408 manat edir. Nağd olaraq alanda təmirli evin kvadrat qiyməti 850 manatdır.
Kirayə ev kimi alanda isə kvadrat 1800 manatdan hesablayırlar. Nəticədə isə yuxarıda qeyd edilən aylıqları kasıb adam ödəyə bilmir. Ona görə də bu evlərin alışı real deyil. Rəşad Həsənov bildirib ki, əgər dövlət kirayə qalan imkansız ailələrin vəziyyətini yaxşılaşdırmaq istəyirsə, gəlir səviyyəsi aşağı olan ailələrə sosial evlər maddi imkanı düzələnə qədər havayı və ya 100 manata qədər aylıqla verilməlidir. İmkanı düzələn ailə ev aldığı zaman da həmin sosial evi tərk etməlidir. Buna isə güclü nəzarət edilməlidir ki, sui-istifadə halları olmasın. Yoxsa gəlir səviyyəsi aşağı olan ailələr aylıq minimum 400 manat ödəyə bilməz. Bu evləri dövlət sahibkardan almalı və vətəndaşlarına bu imkanı təqdim etməlidir. Hazırda ölkədə boşanmaların çoxu da rahat başlarını soxmağa evlərinin olmamağından qaynaqlanır.
Yaşayış sahələrini satmaq öhdəliyi ilə kirayəyə vermə mexanizmi üzrə 22 yanvar 2020-ci il tarixində başlanmış elektron müraciətlərin qəbulu prosesində “Elektron hökumət” portalına istifadəçi daxilolmalarının və aparılan əməliyyatların sayının kütləvi xarakter daşıması və digər texniki səbəblərdən portal artıq yüklənməyə məruz qalıb.Dia.az xəbər verir ki, dəfələrlə Mənzil İnşaat Dövlət Agentliyinin (MİDA) “Sosial ev”lərindən mənzil almaq istəyən Azərbaycan Elmlər Akademiyasının elmi işçisi Əpoş Vəliyev Bizimyol.info-ya bildirib ki, “Kirayə evlər” layihəsi ümidləri doğrultmadı.
“İki il əvvəl mənzil sahibi olmaq üçün MİDA-ya müraicət etdim. Həmin mənzillər aztəminatlı və imkansız ailələrin büdcəsinə uyğun formada təqdim edilsə də, sonradan şərtlərə əlavələr edildi. Müraciət edən şəxslərə həmin mənzillərin kvadratı maya dəyərindən bir neçə dəfə baha təqdim edildi və bununla da “güzəştli ev” sözündən əsər-əlamət qalmadı.
Üstəlik də satış zamanı xakerlərin və proqramistlərin müdaxiləsinin qarşısı alına bilmədi. “Güzəştli mənzil”lər mənzilə ehtiyacı olmayanların əmlak yatırımına çevrildi. MİDA-dan ümidimizi kəsəndən sonra “Kirayə evlər”i gözlədik. Amma çox təəssüflər olsun ki, bu evlərin şərtləri də elə ağırdır ki, aztəminatlı, imkansız ailələr çıxılmaz duruma düşüb. Əslində həmin evlərin kirayə qimətləri mənzil bazarından aşağı olmalı idi ki kirayədə yaşayanları cəlb etməliydi. Amma “Kirayə evlər”in şərti və qiyməti elə bahadır ki, imkansız və aztəminatlı ailələr üçün bu evlər də əlçatmazdır.
Kirayə mənzilin aylıq ödənişi 300 manatdan baha olmamalıdır. Çünki 300 manatdan baha olan halda aztəminatlı, imkansız ailələr bu imkandan yararlana bilməyəcək. Bir sözlə bu gedişlə imkansız, aztəminatlı ailələr kirayədə sürünməkdə davam edəcək”,-deyə Ə.Vəliyev bildirib.
Elmi işçi vurğulayıb ki, “Kirayə evlər”in qiymətlərinin real kirayə mənzil bazarındakı qiymətlərə uyğun olacağı deyilmişdi: “Amma mətbuatda səsləndirilən rəqəmlər real kirayə mənzil bazarındakı qiymətlərdən az qala iki dəfə çoxdur. Bu rəqəm hal-hazırda kirayə mənzildə yaşayanların büdcəsinə uyğun deyil. Ümid edirəm ki, həmin evlərin aylıq ödənişi yenidən nəzərdən keçiriləcək və real kirayə mənzil bazarındakı qiymətlərdən aşağı qiymətə təklif olunacaq”.
“Ünvanlı sosial yardım proqramı genişləndiriləcək”.
Bu sözləri İctimai TV-də yayımlanan “Sabahın Xeyir Azərbaycan” verilişində Əmək və Əhalinin Sosial Müdafiəsi Nazirliyinin (ƏƏSMN) nümayəndəsi Nuranə Həsənova deyib.
ƏƏSMN rəsmisi bildirib ki, qanunvericilik aktlarında bir sıra dəyişikliklər hazırlanıb və hökumətə təqdim edilib:
“Əvvəllər müraciət edərkən ailənin krediti gəlir kimi göstərilirdi. Artıq bu hal nəzərə alınmayacaq. Digər bir dəyişiklik isə ailə tərkibi ilə bağlıdır. Əvəllər ailə tərkibi dəyişəndə bu, sosial müavinətin dayandırılmasına səbəb olurdu. Artıq bu hal da aradan qaldırılacaq.
Gəlir saxlanılmaqla ailənin tərkib hissəsi dəyişirsə, ona təyin olunan ünvanlı sosial yardım dayandırılmır. Bu hal olduğu təqdirdə vətəndaş 5 iş gün müddətində məlumat verməli idi. Bu da yeni dəyişiklikdə 5 gündən 15 günə çatdırılacaq. Bununla yanaşı, digər təkminləşdirmə işləri də nəzərdə tutulur”.
Qeyd edək ki, prezident İlham Əliyev bir müddət öncə Əmək və Əhalinin Sosial Müdafiəsi naziri Sahil Babayevə ünvanlı sosial yardımla bağlı göstəriş vermişdi və bildirmişdi ki, yardımı alan ailələrin sayı artırılsın və meyarlara da yenidən baxılsın.
Xəbər verildiyi kimi İpoteka və Kredit Zəmanət Fondunun dünən saat 10-dan kirayə evlər üçün elektron formada müraciətləri qəbul etməli olan “Elektron ipoteka” sistemi çökdü.
Fond “Elektron ipoteka” sisteminin yaradılması üçün “CyberNet” MMC-yə 6 000 000 manat, sistemin təkmilləşməsi üçün “GT Solution” şirkətinə də 3 000 000 manat vəsait ödəyib.
Məsələ sosial mediada müzakirə olunub. Sosial şəbəkə istifadəçiləri bu qədər vəsait, bu qədər dövlət dəstəyi qarşılığında, dövlət tərəfindən vətəndaşların sosial durumunun yaxşılaşmasına yönələn dövlət əhəmiyyətli bir layihənin bu tip uğursuzluğu tənqid olunub.
Bank məsələləri üzrə ekspert Əkrəm Həsənov fəaliyyətinin ilk günündə çökən “Elektron ipoteka” sistemi ilə bağlı bildirib ki, İpoteka və Kredit Zəmanət Fondunun rəhbəri keçmiş deputat Xanhüseyn Kazımlının oğlu Fəxri Kazımovdur: “Fəxri Kazımov Mərkəzi Bankın rəhbəri Elman Rüstəmovun çanta daşıyanı olaraq karyera qurmuş ən savadsız və təsadüfi məmurlardan biridir”.
İT üzrə mütəxəssis Osman Gündüz bildirib ki, aldığı məlumata görə, Elektron Hökumətin İnkişafı Mərkəzi bir neçə dəfə İpoteka Fonduna xəbərdarlıq edib: “Fonda tövsiyələr verib ki sistem bu formada işə salınsa yüklənməyə tab gətirməyəcək, risklər yüksəkdir və sistem çökə də bilər”.
Qeyd edək ki, “GT Solution” şirkətinin həyata keçirdiyi layihələri əsasən Mərkəzi Bank satın alıb. Mərkəzi Bankın “GT Solution”dan satın aldığı predmetlər “Kompyuter və kompyuter avadanlıqlarının, xidmətlərin satın alınması”, “Mühasibat sisteminin təkmilləşdirilməsinə və digər informasiya sistemləri ilə interfeyslərin yaradılması xidmətlərinin satın alınması”, “İnformasiya sistemlərinin texniki və proqram platformalarının dəstəklənməsi və surətçoxaltma aparatları üçün texniki xidmətlərin satın alınması”, “Elektron ipoteka” sisteminin yaradılması üzrə mal və xidmətlərin satın alınması”dır.
“Azərsun Holdinq”ə məxsus İmişli Şəkər Zavodunun yüzlərlə işçisi bu gün zavodun qarşısında aksiya keçirib. Aksiyaya səbəb 500-ə yaxın əməkdaşın işdən azad olunmasıdır.
Turkustan.info xəbər verir ki, dünən aksiya iştirakçıları zavodun qarşısına toplaşaraq işdən azad olunmalarına etiraz edirlər.
Onların sözlərinə görə, işdən çıxarılmalarına səbəb İmişli Şəkər Zavodunun maliyyə böhranı yaşamasıdır. Artıq İmişli Şəkər Zavodunun nümayəndəsi aksiyaya toplaşanlarla görüşüb və onlara bir ay müddətində yenidən işlərinə qayıdacaqlarını vəd edib. Lakin işçilər deyirlər ki, 2019-cu ilin dekabrında 80-dən çox işçi işdən çıxarıldı, onlara tezliklə işə qayıdacaqları haqda vəd verildi. Amma bu baş vermədi. İndi isə 450-500-ə yaxın işçini ixtisar ediblər.
Məlumatlara görə rayonun icra hakimiyyəti başçısı yaranmış vəziyyətlə bağlı Bakıya gəlib, onun işçilərin kütləvi ixtisarını “Azərsun Holdinq” rəhbərliyi ilə müzakirə edəcəyi gözlənilir.
Məsələ ilə əlaqədar İmişli Rayon İcra Hakimiyyəti başçısının köməkçisi Elmin Qəhramanov virtualaz.org-a bildirib ki, yaxın vaxtlarda əlaqə saxlayaraq aksiya ilə bağlı açıqlama verəcəklər.
“Azərsun Holdinq”-in mətbuat xidmətindən isə sayta bildirilib ki, zavod həqiqətən də, ciddi böhran vəziyyəti ilə qarşılaşıb, lakin bununla belə, ixtisar halı baş verməyib. Holdinqin açıqlamasından məlum olur ki, əslində ixtisardan da betəri olub-İmişli Şəkər Zavodu böhranla üzləşərək fəaliyyətini ümumiyyətlə dayandırıb. Və zavod bu ildən etibarən ancaq payız mövsümündə məhdud həcmdə şəkər çuğundurunu emal etməklə kifayətlənəcək.
“Azərbaycan Şəkər İstehsalat Birliyi” MMC-nin İmişli rayonunda yerləşən şəkər emalı zavodu ciddi böhran vəziyyəti ilə qarşılaşıb. 2016-cı ildən etibarən Rusiya Federasiyasından ölkəyə şəkər tozu idxalının miqyası durmadan artmaqdadır. Üstəlik idxal olunan şəkər tozunun qiyməti dempinq siyasəti ilə formalaşır. İmişli şəkər zavodunda maya dəyərinin aşağı salınması, qiymətdə rəqabət qabiliyyətinin artırılması yönündə milyonlarla ABŞ dolları ilə ölçülən investisiya qoyuluşları, həmçinin digər səmərələşdirici səylərin həyata keçirilməsinə baxmayaraq dempinqli idxal olunan məhsul ilə rəqabət aparılması obyektiv olaraq mümkün deyil. Məhz buna görə də, müəssisəmiz son illərdə külli miqdarda zərərlə fəaliyyət göstərir”, – Holdinqdən bildirilib.
Məlumatda həmçinin qeyd olunur ki, Azərsun Holdinq rəhbərliyinin ölkəmizin sosial-iqtisadi inkişafı və regionda məşğulluğun təmin olunmasına verdiyi yüksək əhəmiyyətin nəticəsi olaraq müəssisə fəaliyyəti dayandırılmayıb: “Hər kəsə məlumdur ki, İmişli rayonu başda olmaqla, Mərkəzi Aran bölgəsinin sosial-iqtisadı həyatında və işsizliyin aradan qaldırılmasında müəssisəmizin rolu həlledici dərəcədə mühimdir. Yaranmış bu böhran vəziyyətində, Holdinqimizin bütün xoş niyyətli səylərinə rəğmən müəssisəmizin tam gücü ilə ilboyu fəaliyyət göstərməsi çətinləşəcək. Hazırda İmişli Şəkər Zavodunda ixtisar baş vermir. Sadəcə istehsal müəssisəsinin fəaliyyətini dayandırması ilə bağlı ölkə qanunvericiliyinin tələbinə uyğun olaraq işçilərə ödənişlər edilir. Durum belə davam edərsə istehsal müəssisəmiz 2020-ci ildən etibarən sadəcə payız mövsümündə məhdud miqdarda şəkər çuğunduru emalını həyata keçirməklə fəaliyyətini xeyli kiçiltməyə məcbur qalacaq ki, çox təəssüf, işçi heyətimizin sayına yenidən baxmalı olacağıq”.
Məlumatda həmçinin qeyd olunub ki, ki, artıq 3 ildir ki, İmişli Şəkər Zavodu zərərlə işləyib.
Qeyd edək ki, İmişli Şəkər Zavodu Azərbaycanın ən böyük zavodlarındandır. Gündə 1100-1200 ton yüksək keyfiyyətli kristal şəkər istehsal etmək gücünə malik zavodda 1400 nəfər çalışır. /Yeni Sabah/
Kirayə mənzillər üçün elektron müraciət ötən gün səhər saat 10:00-da başlamalı idi. Ancaq sayta daxil olanların çoxluğu səbəbindən elektron müraciətləri qeydə almaq mümkün olmayıb.
İpoteka və Kredit Zəmanət Fondunun ötən gün elektron müraciətləri qəbul etməli olduğu elektron sistem çökdü və vətəndaşlar prosesi icra edə bilmədilər.
Mövzu ilə bağlı “Xəzər” TV süjet hazırlayıb.
Məsələ ilə bağlı açıqlama yayan İpoteka və Kredit Zəmanət Fondu elektron müraciətin müvəqqəti dayandırıldığını və problemin həll olunması ilə bağlı vətəndaşlara əlavə məlumat veriləcəyini bildirib.
İpoteka və Kredit Zəmanət Fondunun mətbuat katibi Yeganə Ramazanova qiymətlərin binaların yerləşdiyi yerdən asılı olaraq dəyişdiyini bildirib:
“Aylıq ödəmələrin dəyəri yaşayış sahəsinin dəyərindən və kirayə müqaviləsinin müddətindən asılı olaraq dəyişir”.
Tikintini həyata keçirən şirkətin baş mühəndisi binaların tikintisinin və otaqların təmirinin beynəlxalq standartlara uyğun olduğunu bildirir.
İpoteka və Kredit Zəmanət Fondu kirayə mənzillərin ipoteka kreditlərindən bir sıra üstünlükləri olduğunu açıqlayıb. Fondun kirayə mənzil departamentinin direktoru Ramil Tahirov bildirir ki, ipoteka kreditlərində vətəndaşlar üçün şərtlər daha ağırdır.
Ramil Tahirovun sözlərinə görə, adi kirayə evlərdən üstünlüyü isə budur ki, bu mexanizmdə sonda mənzil vətəndaşın özünə qalır. Ancaq adi kirayədə xərclənən pullar heç nə ilə əvəzlənmir.