İqtisadiyyat Nazirliyi sahibkarlıq subyektlərində zəruri qayda və tələblərə əməl olunmasına nəzarət tədbirləri çərçivəsində monitorinq keçirib.

Nazirlikdən Trend-ə verilən məlumata görə, sentyabrın 23-də keçirdiyi monitorinqlər zamanı Yasamal rayonunda “Məhsul kafesi”ndə, “Ceviz tea lounge” iaşə obyektində, “Chai rooms çayxana”da, “Lamanda restoranı”nda, Sabunçu rayonunda Həsən Ağayevə məxsus “Qutab evi”ndə, Nicat Əhmədova məxsus “Market”də, Suraxanı rayonunda “7 gözəl kafesi”ndə, Orxan Məmmədliyə, Ehtibar Hacıyevə məxsus tikinti materialları mağazalarında, Xətai rayonunda “Şah şərab evi”ndə, “Beer barel kafe”də, Binəqədi rayonunda “Endi market”də, “Məhəllə kafesi”ndə, “Beer town kafesi”ndə, “Uğur kafesi”ndə, Səbail rayonunda “Kəngərli kafesi”ndə, “Karaca geyim mağazası”nda, “Dress code geyim mağazası”nda, “Coffee station” iaşə obyektində, Nizami rayonunda “Organic kendchi restaurant”da, “Hira kafe”də, “Kafe Ayturan”da, Nərimanov rayonunda “Dahua mağaza”da, “Jasmin market”də, “Baku castle” iaşə obyektində, Xəzər rayonunda “Turqut inşaat” mağazasında, “Zəm-zəm restoranı”nda, Qaradağ rayonunda "Pivnuşka kafe”də, "Nur kafe”də, "Ləzzət kafe”də, “Vedi kafe”də, Nəsimi rayonunda “Elit kafe”də, Mehman Həsənova, Nemət Sadıqova, Azər Cəfərova məxsus pərakəndə ticarət obyektlərində, Sumqayıt şəhərində “Nizami kafesi”ndə, “Barjomi kafesi”ndə, “Ana və uşaq kafesi”ndə, Abşeron rayonunda “Halal market”də, "Yaşıl bazar meyvə-tərəvəz satışı” ticarət obyektində, “Palma çay evi”ndə, “Hunkar sofrası” iaşə obyektində, ümumilikdə 127 obyektdə epidemiya əleyhinə rejimin, sanitariya-gigiyena tələblərinin pozulduğu müəyyən edilib.

Nöqsanlara yol vermiş sahibkarlıq subyektləri barədə İnzibati Xətalar Məcəlləsinə uyğun olaraq tədbirlər görülüb.

Uğur Məmmədli leykemiyadan əziyyət çəkir.

Axar.az xəbər verir ki, ailənin körpənin müalicəsini davam etdirmək üçün maddi imkanı çatmır.

Yardım etmək istəyən şəxslər 055 746-57-77 nömrəsi ilə əlaqə saxlaya bilərlər.

Bundan başqa, terminallardan “Bank xidmətləri” bölməsindən Kapital Bank seçərək, 4169 7413 5486 7499 nömrəli hesaba pul köçürə bilərsiniz.

2020-2021-ci tədris ili üçün ali məktəblərə qəbul olan abituriyentlərin daxil olduqları təhsil müəssisəsinə qeydiyyatı başlayıb.

Axar.az xəbər verir ki, tələbə adı qazananlar sentyabrın 25-dən oktyabrın 7-dək sənədlərini ali məktəblərə təqdim etməlidirlər.

Qeydiyyat onlayn qaydada həyata keçirilir. Abituriyentlər ali təhsil müəssisələrinin internet saytlarının müvafiq bölmələrinə daxil olmaqla, qeydiyyat üçün tələb olunan sənədlər və onlayn qeydiyyat forması ilə tanış ola bilərlər.

Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilmədən imtina etməsi kimi qiymətləndiriləcək və onun qəbul haqqında əmri ali məktəbə göndərilməyəcək.

Qeyd edək ki, ali təhsil müəssisələrinin müsabiqəsində 66464 nəfər iştirak edib. Onlardan 42731 nəfəri (o cümlədən 5785 subbakalavr) ali təhsil müəssisələrinə qəbul olunub. 20799 (o cümlədən 779 subbakalavr) nəfər dövlət sifarişi əsasında, 21932 (o cümlədən 5006 subbakalavr) nəfər isə ödənişli əsaslarla təhsil almaq hüququ əldə edib.

Bu il I ixtisas qrupu üzrə 400 baldan yuxarı nəticə göstərib kənarda qalan abituriyentlərin sayı dörd nəfər olub.

Axar.az xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə deyib.

Onun sözlərinə görə, Il xtisas qrupu üzrə 200 baldan yuxarı bal toplayan bir nəfər belə kənarda qalmayıb. Ill ixtisas qrupu üzrə 500 baldan yuxarı nəticə göstərən və ali təhsil müəssisəsinə daxil olmayan cəmi bir nəfərdir. IV xtisas qrupu üzrə 500 baldan yuxarı nəticə göstərən və universitetə daxil olmayan səkkiz nəfərdir.

M.Abbaszadə bu şəxslərin ali məktəbə qəbul ola bilməməsini onların ixtisas seçimi edə bilməməsi, bəzilərinin elektron ərizələrində 1 ödənişsiz ixtisas adı yazması ilə əlaqələndirib.

O, həmin şəxslərin ikinci mərhələdə iştirak edə bilməsinin mümkün olduğunu söyləyib.

Dünyanın bir çox inkişaf etmiş ölkəsində qəbul edilmiş eftanaziya (sağalmaz, ölümcül, dəhşətli ağrılardan əziyyət çəkən insanlar və ya onların birinci dərəcəli yaxınları tərəfindən xəstənin həyatına son verilməsi) ölkəmizdə də tədbiq edilə bilərmi?

Məsələ ilə bağlı Axar.az-a açıqlama verən millət vəkili Fazil Mustafa bildirib ki, eftanaziya mübahisəli bir məsələdir. Çünki tədbiqi və hansı üsulda olması müəyyənləşməlidir:

“Prinsipcə bu məsələ ölkəmizdə də tədbiq edilə bilər. Uzun illər ağır və şiddətli ağrılardan əziyyət çəkən, sağalma ehtimalı olmayan bir şəxsin məsul qurumun rəyi ilə öz həyatına son verməsi daha humanist bir addım olar. Düşünürəm bu gün bizdə də belə bir qanunun qəbuluna ehtiyac var”.

Professor Adil Qeybulla deyib ki, eftanaziya bütün ölkələrin qanunvericiliyində öz əksini tapmalıdır:

“Bəzi tibbi proseslər ilə bağlı məsələlər təəssüf ki, qanunda öz əksini tapmır. Misal üçün donor, süni mayalanma, daşıyıcı ana və ya qeyd etdiyim eftanaziya. Mən təklif edərdim bu məsələlər qanunda öz əksini tapsın.

Azərbaycan cəmiyyəti psixoloji olaraq bir çox məsələlərə hazır deyil. Çünki insanların bu kimi məsələlərə yanaşması çox fərqlidir. Baxın, bayaq qeyd etdiyimiz donor haqqında qanuna hazır deyil. Misal üçün adətən bizdə donor kim olur? birinci dərəcəli qohumlar. Digər tərəfdən, donor olacaq şəxs adətən gənc olmalıdır. Bu zaman isə qanunla onun himayədarı, yəni valideynin rizası lazımdır. Buna isə çox hallarda valideynlər razı olmur. Bu mənada həm eftanaziya, həm də digər adını çəkdiyim məsələlər qanunda öz əksini tapmalıdır”.

Beynəlxalq hüquq üzrə professor Fərhad Mehdiyev saytımıza açıqlamasında qeyd edib ki, uzun illər ərzində eftanaziya heç bir halda hüquqi olaraq qəbul olunmurdu:

“Bunun əsas səbəbi də hüquq instutlarının nəzəriyyəsi ilə bağlı idi. Çünki hesab olunurdu ki, şəxsiyyət hüquqlarından biri olan yaşamaq hüququndan insan imtina etməməlidir. Bu gün ölüm hökmünə qarşı çıxanların bir çoxunun da əsas arqumenti məhz budur. Yəni insana həyat Tanrı tərəfindən verilib və canı da o almalıdır. İnsan özü öz həyatına son verə bilməz.

Lakin zamanla fərqli elementlər ortaya çıxmağa başladı. Misal üçün insanlara işgəncə etmək, qeyri-insani rəftar etmək olmaz. Bəzi insanların xəstəlikləri elə bir dərəcədə olur ki, onların bu şərtlərdə yaşaması qeyri-insanı rəftar kimi qiymətləndirilir. Bu mənada bəzi inkişaf etmiş ölkələr bunu əsas gətirərək eftanaziyanı qanuniləşdirdi. Eftanaziya müasir dövrün şərtləri ilə daha humanist bir yanaşmadır. Ona görə hesab edirəm ki, bizdə də belə bir qanuna ehtiyac var”.

Narkotik tərkibli bitkilərin aqrotexniki qaydada qulluq edilərək yetişdirilməsi ilə məşğul olan şəxslərə qarşı Abşeron Rayon Polis İdarəsinin (RPİ) Qobu Polis Bölməsinin (PB) əməkdaşları tərəfindən növbəti əməliyyat tədbiri həyata keçirilib.

Distant təhsilin başlamasının 10 günü tamam olmadan artıq sosial şəbəkələrdə valideynlər və tələbələr internetin sürətinin zəifləməsindən və onlayn dərslərə qoşula bilməmələrindən şikayət edirlər.

Məsələ ilə bağlı Axar.az-ın sorğusuna cavab olaraq Nəqliyyat, Rabitə və Yüksək Texnologiyalar Nazirliyinin mətbuat katibi Günel Gözəlova bildirib ki, eyni anda internetə qoşulmaların sayı artıdığı üçün internetin sürətiylə bağlı çətinliklərin yaranması qaçılmazdır:

“Pandemiya dövründə karantin tətbiq edildiyi üçün internet xidmətlərinə olan tələbat yüksəlib və istifadə olunan internet trafiki kəskin şəkildə artıb. Məktəb və universitetlər distant təhsilə keçdiyindən, evdə oturan şagirdlərin və tələbələrin izlədiyi kontentlər bütün videotrafikin təxminən 70%-ni təşkil edir. Hər kəs eyni zamanda internetə qoşulmağa çalışır. Bu halda isə çətinliklər qaçılmazdır. İstifadəçilərin internet xidmətlərinə tələbatının artması ilə əlaqədar nazirlik ölkə üzrə internet infrastrukturunun xidmət keyfiyyətinin yüksəldilməsi istiqamətində kompleks işlər aparır. Görülən işlər sırasında ilk olaraq ölkə üzrə qlobal internet kanallarına qoşulma sürəti artırılıb. Bununla yanaşı, internet xidməti təqdim edən operator və provayderlər də milli internet operatorlarından aldıqları tutumları artırıb”.

Qurum rəsmisi bildirib ki, ötən illə müqayisədə bu ilin son 9 ayı üzrə “Baktelekom”un təqdim etdiyi multimedia xidmətlərinə qoşulmada 40% artım müşahidə edilib:

“Pandemiya ilə əlaqədar internet xidmətlərinə artan tələbat fonunda bu ilin 8 ayında dövlət telekommunikasiya operatorları tərəfindən 100 min abunəçiyə internetə qoşulmaq üçün texniki imkan yaradılıb və 65 minə yaxın vətəndaşın şəbəkəyə qoşulması təmin edilib. Nazirliyin tabeliyində xidmət göstərən Baktelekom və Aztelekom MMC pandemiya dövründə paytaxt sakinlərini fasiləsiz rabitə xidmətləri ilə təmin etmək üçün gücləndirilmiş iş rejimində fəaliyyət göstərir.

Ötən illə müqayisədə bu ilin son 9 ayı üzrə “Baktelekom”un təqdim etdiyi multimedia xidmətlərinə qoşulmada 40% artım müşahidə olunub.

Yeni tədris ilinin başlanması ilə əlaqədar Bakı kəndlərində yerləşən fərdi evlərdə optik şəbəkənin inşası davam etdirilir və sakinlərin rabitə xidmətlərinə qoşulması operativ şəkildə həyata keçirilir. Bu yaxında Biləcəri qəsəbəsi və Hövsan yolundakı Qum adasında yerləşən yeni yaşayış massivinin sakinləri optik xidmətlərlə təmin ediliblər. Hazırda Nizami, Xətai, Sabunçu və Xəzər rayonlarında fərdi evlərdən ibarət olan yaşayış massivlərində tərəfimizdən optikləşdirmə işləri aparılır”.

G.Gözəlova hazırda regionlara ötürülən trafikin həcmində 40%-dən çox artım müşahidə olunduğunu söyləyib:

“Regionlarda telekommunikasiya xidmətlərinə olan tələbatın ödənilməsi məqsədilə Aztelekom MMC tərəfindən mərhələli şəkildə infrastruktur layihələri həyata keçirilir. Həm magistral, həm də paylayıcı şəbəkələr müasirləşdirilir. Magistral xətlərin ötürülmə qabiliyyətinin qüzqat artırılması məqsədilə DWDM texnologiyası tətbiq edilib”.

Bakı-Quba yolunda cari təmir işlərinə başlanılıb.

Axar.az xəbər verir ki, bu barədə Trend-ə açıqlamasında Azərbaycan Avtomobil Yolları Dövlət Agentliyinin Mətbuat xidmətinin rəhbəri Anar Nəcəfli deyib.

O bildirib ki, artıq əraziyə texnikalar cəlb edilib:

“Bakı-Quba yolunda zərurət olduqca cari təmir işləri aparılır, yolun dağılmış hissələri bərpa edilir. Artıq bu il də yolda təmirə ehtiyac olan ərazilərdə işlər başlanılıb. Yolun bir hissəsi dağıldığı üçün həmin ərazilər bərpa edilir”.

A.Nəcəfli əlavə edib ki, yolda təmir işləri maksimum hərəkətə mane olmamaqla həyata keçirilir. Yolun dağılmış hissələri sökülərək həmin yerlərə asfalt örtük vurulacaq.

Sentyabrın 24-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi, lakin səhər yarımadanın bəzi yerlərində zəif duman olacağı, qısamüddətli az yağış yağacağı gözlənilir. 

Milli Hidrometeorologiya Xidmətindən “Qafqazinfo”ya verilən məlumata görə, cənub-şərq küləyi əsəcək.

Havanın temperaturu Abşeron yarımadasında gecə 18-20, gündüz 25-28, Bakıda gecə 18-20, gündüz 26-28 dərəcə isti olacaq.

Atmosfer təzyiqi normadan yüksək 762 mm civə sütunu, nisbi rütubət gecə 60-70, gündüz 40-45 faiz təşkil edəcək.

Sentyabrın 24-də Azərbaycanın rayonlarında havanın əsasən yağmursuz keçəcəyi, lakin gündüz bəzi dağlıq ərazilərdə qısamüddətli yağış yağacağı gözlənilir. Şərq küləyi əsəcək.

Havanın temperaturu gecə 16-20, gündüz 25-30, dağlarda gecə 6-11, gündüz 12-16 dərəcə isti olacaq

Tibbi-meteoroloji proqnoz

Sentyabrın 24-də Abşeron yarımadasında komfort temperatur şəraiti gözlənilir ki, bu da meteohəssas insanlar üçün əlverişlidir.