 |
 |
Bu gün saat 00:20 radələrində Ermənistan Silahlı Qüvvələrinin bölmələri tərəfindən Ermənistanın Noyemberyan rayonunun Zorakan kəndi istiqamətindən iri çaplı silahlardan atəş açılmaqla atəşkəs rejimi pozulub, Qazax rayonunun II Şıxlı kəndi yaxınlığındakı sərhəd döyüş məntəqəsinin mövqeləri atəşə tutulub.
Daxili İşlər Nazirliyi vətəndaşlara müraciət edərək müvəqqəti yaşadıqları yer üzrə nazirliyin saytında qeydiyyatdan keçərək məlumat vermələrini tələb edir.
“Qafqazinfo”nun verdiyi xəbərə görə, nazirliyin müraciətində qeyd olunur ki, bu, vətəndaşların təhlükəsizliyinin qorunması və ölkədə sabitliyin təmin olunması baxımından əhəmiyyətlidir: “Əgər vətəndaşlar gəldikləri ünvanda 60 gündən az yaşayacaqlarsa 24 saat ərzində, 60 gündən çox yaşayacaqlarsa 7 gün ərzində müraciət edib qeydiyyatdan keçməlidirlər. Bunun üçün Baş Pasport, Qeydiyyat və Miqrasiya idarəsinin saytında onlayn xidmət də yaradılıb, mobil tətbiqdən də istifadə oluna bilər”.
“Yaşayış yeri və olduğu yer üzrə qeydiyyat haqqında” qanunun 10-cu maddəsinə görə, mehmanxanaya, sanatoriyaya, istirahət evinə, kempinqə, turist bazasına, yataqxanaya, xəstəxanaya və digər belə ictimai yerlərə gələn vətəndaş üçün ərizə-anket doldurulur və həmin yerin müdiriyyətinə verilir. Müdiriyyət ərizə-anketi 24 saat ərzində müvafiq dövlət orqanına təqdim edir.
Bu qaydanın pozulmasına görə, İnzibati Xətalar Məcəlləsinin 563-cü maddəsi üzrə vətəndaşa xəbərdarlıq edilir, bundan sonra o, 30 manat, vəzifəli şəxslər isə 500 manatdan 800 manatadək cərimələnir.
Yəni, oteldə göstərilən müddətdə qalan şəxsi qeydiyyatdan keçirməyən rəhbərlik 500-800 manat cərimələnə bilər.
Dövlət Miqrasiya Xidməti yanında İctimai Şuranın sədri Azər Allahverənov “Qafqazinfo”ya açıqlamasında bildirib ki, qanunun bu tələbi daimi olub: “Əvvəllər qismən də işləyirdi. Bəzi strukturlara sənəd təqdim olunanda müvəqqəti yaşadığı yer üzrə qeydiyyatdan keçmək tələb olunurdu. Deyək ki, hansısa rayonda qeydiyyatda olan şəxs Bakıya gəlib işləyəndə paytaxtdakı bəzi qurumlar ondan həmin sənədi tələb edirdi. İndi maarifləndirici işlərin aparılmasının güclənməsinin, bu mövzu ətrafında müzakirələr aparılmasının səbəbini bilmirəm.
Qanuna görə, əgər siz 60 gündən artıq müddətə başqa bir ünvanda müvəqqəti yaşamaq niyyətindəsinizsə, Daxili İşlər Nazirliyində qeydiyyatdan keçməlisiniz. İndi bölgələrdən gəlib Bakıda əmək fəaliyyəti ilə məşğul olub, kirayə evlərdə yaşayanlar var. Onlar ən azı ayda bir dəfə öz evlərinə gedib-gəlirlər. Faktiki olaraq onlar 60 gündən az müddətə burada qalırlar. Ona görə də bu qaydanı həmin şəxslərə tətbiq etmək olmaz. Lakin bölgələrdən gəlib Bakıda 60 gündən çox fasiləsiz qalan şəxslər, qanuna görə, mütləq qeydiyyatdan keçməlidirlər. Bu, kirayə evlərdə qalanlara da aiddir, mehmanxanada qalanlara da. Eyni zamanda, Bakıdan bölgələrə gedib orada qalanlara da tətbiq olunur. Daxili İşlər Nazirliyi bu məsələ ətrafında vətəndaşlara geniş izahat verməlidir ki, yanlış yozulmalar olmasın və kimlərsə bundan sui-istifadə etməsin.
Bundan başqa, məsələn, Şəkidə qeydiyyatda olmayan şəxs Şəkiyə gedib orada oteldə 10-15 günlük qalırsa, həmin otel rəhbərliyi həmin şəxslərin qeydiyyatı əsasında onların burada qalacağını Daxili İşlər Nazirliyinə məlumat verməlidir”.
Ekspert A.Allahverənov bildirib ki, bu qeydiyyatın aparılması haqda maarifləndirici məlumatların yayılması DİN-dən daha çox başqa qurumlara lazımdır: “Fikrimcə, bu məlumatlar Daxili İşlər Nazirliyi üçün yox, digər strukturlar üçün əhəmiyyətlidir. Məsələn, Dövlət Statistika Komitəsi ölkə əhalisinin hərəkət dinamikası ilə bağlı uçot aparır. Əmək resurslarının bölüşdürülməsi, ölkə əhalisinin yerdəyişməsi və bunun əmək bazarı ilə əlaqələndirilməsi baxımından bu məlumatlar vacibdir. Əmək və Əhalinin Sosial Müfadiəsi Nazirliyi bu gün əmək bazarı və əmək resurlarının idarə olunması ilə bağlı müəyyən proqnozlar verir. Biz hər yerdə urbanizasiya barədə danışırıq, paytaxta güclü axın var. Bu da bölgələrdə əmək resurslarının tükənməsinə gətirib çıxarır. Beləliklə, Dövlət Statistika Komitəsinin və ya Əmək və Əhalinin Müdafiəsi Nazirliyinin bu qeydiyyatı aparmaq səlahiyyəti olmadığı üçün, Daxili İşlər Nazirliyi müvəqqəti qeydiyyatda olanların məlumatlarını toplayıb digər strukturlara ötürür, onlar da bunun əsasında dövlət strategiyasını müəyyənləşdirirlər”.
BNA 423 parkinqi Bakı Şəhər İcra Hakimiyyətindən aldı; ekspert: “Hər maşın sürənə varlı kimi baxmaq olmaz”
Bakı Şəhər İcra Hakimiyyəti (BŞİH) Bakı Nəqliyyat Agentliyinə (BNA) 423 parkinqi təhvil verib. Bunu BNA-nin mətbuat katibi Mais Ağayev bildirib. M.Ağayev deyib ki, yerlər mütəxəssislər tərəfindən təhlil edilir: “Lakin bu o demək deyil ki, qeyd edilən parklanma yerlərinin hər birində agentlik yenidən parklanma təşkil edəcək. Bu yerlər mütəxəssislərimiz tərəfindən təhlil edilir və yalnız məqsədəmüvafiq hesab edilən, yəni nəqliyyat sıxlığına, xüsusən də ictimai nəqliyyatın hərəkətinə maneə yaratmayan məntəqələrdə parklanma yerləri təşkil ediləcək. Parklanma yerlərinin idarə edilməsi ilə bağlı işlər artıq yekunlaşmaq üzrədir. Yaxın aylarda vurğuladığım məsələlər öz təsdiqini tapdıqdan sonra işlərin icrasına başlanılacaq”.
O eyni zamanda qeyd edib ki, hazırda BNA tərəfindən parklanmanın idarə edilməsi üçün zəruri olan komponentlərin təkmilləşdirilməsi işləri davam etdirilir. “Bu işlərə Bakı şəhəri üzrə parklanma tələbatına uyğun olaraq zonaların müəyyənləşdirilməsi, bu zonalar üzrə qiymət tarifləri, onların qüvvədə olma vaxtlarının təyin edilməsi və qanunvericilikdən irəli gələn digər məsələlər daxildir. Qeyd edilən məsələlər parklanmanın idarə edilməsi üçün çox vacibdir. Parklanmanın düzgün idarə edilməsi Bakı şəhərində nəqliyyat şəraitinin yaxşılaşdırılması, sıxlıqların azaldılması, insanları şəxsi nəqliyyat vasitələrindən istifadədən çəkindirmək və ictimai nəqliyyatdan istifadəni stimullaşdırmaq üçün əsas amillərdən biridir. Bu sadalananlara nail olmaq şəhərin ekoloji mühitini yaxşılaşdırmaq, atmosferin çirklənmə səviyyəsini aşağı salmaq, digər nəqliyyat vasitələrinin səyahət vaxtını və yanacaq sərfiyyatını azaltmaqla iqtisadi cəhətdən də müsbət nəticələr əldə etmək deməkdir”. Ölkə başçısının 6 iyulda imzaladığı fərmanla Bakı şəhərinin inzibati ərazisində parklanma, habelə dayanma və durmanın qadağan edildiyi yerlərdə inzibati xəta törədilməsinə görə elektron protokolların tərtib edilməsi məqsədilə foto və ya videoqeydiyyat funksiyalarına malik xüsusi texniki vasitələrin quraşdırılması Bakı Nəqliyyat Agentliyinə həvalə edilib. Bu fərmana görə, indiyədək Bakı Şəhər İcra Hakimiyyətinin səlahiyyətində olan parkinqlər də BNA-nın nəzarətinə verilib. Lakin müəyyən səbəblərdən parklama yerlərinin meriya tərəfindən təhvili gecikdirilirdi.
BNA-nın parkinqlərdə qiymət artımı ilə bağlı Nazirlər Kabinetinə müraciətlərinin olması haqda məlumatlar var. Bakının mərkəzində yerləşən parkinqlərin qiymətləri real vəziyyətə uyğun hesab edilmir. Bakının mərkəzində ən bahalı parkinq “28 Mall” ticarət və əyləncə mərkəzinin altında yerləşir. “28 Mall”da parklamanın qiyməti belədir:
1 saat – 1 manat
1-3 saat – 2 manat
3-5 saat – 3 manat
5-7 saat – 5 manat
7-24 saat – 20 manat
Parkinqdə təqdim olunan giriş çekini itirən müştərilər 20 manat cərimə olunur. Bulvar ərazisindəki “Park Bulvar”da isə qiymətlər belədir:
0-1 saat – 1 manat
1-3 saat – 2 manat
3-8 saat – 3 manat
8-12 saat – 6 manat
12-15 saat – 10 manat
Giriş çekinin itirilməsinin qarşılığında isə 10 manat cərimə ödənilməlidir. Parkinqdə 24 saat avtomobil saxlamaq qadağandır. Bakıda fəaliyyət göstərən ən böyük avtomobil dayanacaqlarından biri isə Fəvvarələr meydanının yanındakı “Garage”dir. Burada təklif olunan qiymətlər də bahadır. 5 mərtəbəli dayanacaq parkinq sizə 0-1 saat – 1 manat
1-3 saat – 2 manat
3-6 saat – 3 manat
6-12 saat – 6 manat
12-24 saat – 10 manata
başa gələcək.
Azərbaycanın baş meydanı – Azadlığın altındakı ölkənin ən böyük yeraltı avtomobil parkinqində qiymətlər 1 manatdan başlayır.
0-2 saat – 1 manat
2-5 saat – 2 manat
5-12 saat – 3 manat
12-24 saat – 6 manat
Bu dayanacaq 24 saatlıq istifadəsi üçün ən ucuz qiymətə xidmət göstərən dayanacaqdır. İtirilmiş parkinq çekinə görə cərimə isə 60 çörək qiyməti qədərdir: 30 manat.
Füzuli meydanı yaxınlığındakı yeraltı dayanacağın da minimal qiyməti 1 manatdan başlayır. Parkinqlərdən 15 dəqiqəlik istifadə pulsuzdur. Amma 15 dəqiqəlik limit çox parkinqə giriş-çıxış müddətini aşır. Pulsuz xidmətdən istifadə etmək praktiki olaraq mümkün deyil. Bakıda parkinqlər bahadır deyə sürücülər alternativ variantlara üstünlük vermək məcburiyyətində qalırlar. Nəqliyyat vasitələrini daha çox məhəllələrdə, həyətlərdə saxlamağa üstünlük verirlər.
ElmÉddin Muradlı ile ilgili görsel sonucu
Ekspert, avtosfer.az saytının baş redaktoru Elməddin Muradlı Bakıda parkinq qiymətlərinin baha olmasını diqqətə çatdırır. Deyir ki, Bakı Nəqliyyat Agentliyi təhvil aldığı parkinqlərdə qiymət məsələsi ilə bağlı Nazirlər Kabinetinə uyğun təkliflər verə bilər: “Qiymət müəyyən olunarkən ölkə vətəndaşlarının maddi durumu nəzərə alınmalıdır. Hər maşın sürənə varlı, iş-güc sahibi kimi baxmaq olmaz. Nizami küçəsi, Neftçilər prospektində və bu kimi küçələrdə, prospektlərdə bir qiymət, Əhmədlidə, Sabunçuda bir başqa qiymətlər təklif olunmalıdır. ”İçərişəhər”ə kim maşınla girmək istəyirsə, orada yaşayanlar xaric, 2-3 manat parkinq haqqı ödəsinlər. Amma bu cür qiyməti insanların istirahətə gəldiyi Milli Parkın yaxınlığındakı parkinqlərə tətbiq etmək olmaz. Həm də parkinqlər uyğun yerlərdə olmalıdır. Kukla Teatrına uşaq gətirən valideyn maşını park etmək üçün Azadlıq meydanının altındakı parkinqə gedib çıxmamalıdır. Yəni parkinqlər şəhərdə çox yerdə olmalıdır. Hazırda durum qiymət artımına getməyə adekvat deyil. İlk növbədə hər kəsə əlçatan olan parkinqlər və qiymətlər müəyyən olunmalıdır. Vətəndaş şəhərin kənarından mərkəzə istirahətə gəlirsə, deməli, Milli Parkda, teatrda, əyləncə yerlərində azı 3 saat keçirəcək. Ondan bu müddət üçün niyə 3-5 manat alınmalıdır?”
Elməddin Muradlı deyir ki, bu gün parkinq yerləri bərbad durumdadır: “Şəhərdə tikinti o şəkildə aparılıb ki, bu gün küçələrdə parkinqə demək olar ki, yer qalmayıb. Belə bir halda qiymət artımından danışmaq yersizdir. Vətəndaşların maddi durumunu nəzərə almaq lazımdır. Hamının gəliri eyni deyil ki, hər gün parkinqə 3-5 manat xərcləsin. Elə məmur övladları var ki, ömürlərində 1 gün belə işləməyiblər, 250-300 minlik maşınlarda gəzir, parkinqə 100 manat versələr belə veclərinə deyil. Amma elə vətəndaşlar da var ki, şəhərin mərkəzinə gündəlik qazanc üçün gəlirlər. Gündə 15-20 manatı zorla qazanırlar. Onlardan hər gün 2-3 manat parklama haqqı almaq uyğun deyil. Parklama qiymətləri müəyyən edilərkən belə məsələlər nəzərə alınmalıdır. Fəhlə maşınla şəhərin mərkəzinə gələ bilməz? Hər maşın sürənə imkanlı şəxs kimi baxmaq olmaz”.
Elməddin Muradlı deyir ki, şəhərin elə mərkəzi küçələri var ki, günün müəyyən saatlarında həmin küçələrdə parkinqə icazə verilə bilər: “Məsələn, Neftçilər prospektində Kukla Teatrını keçəndən sonra üzü Muzey Mərkəzinə doğru yol 2 zolaqdan 5 zolağa qədər genişlənir. Bulvar boyunca, düz Azadlıq meydanına qədər sağ zolaqdan tək-tək sürücülər istifadə edir. Məsələn, axşam 7-dən sonra həmin zolaqda parkinqə icazə verilə bilər. Heç bir qanunda Bakıda bütün parkinqlərin ödənişli olması yazılmayıb. Məcbur deyil ki, hər parkinq pullu olsun. Saatı 1 manata parkinq ”Torqovı”da, Malakan bağı ətrafındakı parkinqlərdə olsun. Amma şəhərin hər tərəfində bu cür parkinq haqqı almaq düzgün deyil”.
Xəbər verdiyimiz kimi, Azərbaycan Qida Təhlükəsizliyi Agentliyi (AQTA) Ağdaş rayonunda qanunsuz fəaliyyət göstərən limonad sexi aşkar edib.
“Qafqazinfo” xəbər verir ki, AQTA sözügedən sexdə istehsal olunmuş limonadların adını da yayıb. Bunlar “Bünaytur”, “Tala”, “Lavizna” əmtəə nişanlı qazlaşdırılmış alkoqolsuz içkilərdir (limonad).
Xatırladaq ki, Xosrov kənd sakini fiziki şəxs Orucov Yusif Haqverdi oğluna məxsus alkoqolsuz içkilər istehsalı müəssisəsi ilə bağlı qanunvericiliyin tələbləri çərçivəsində tədbirlər görülüb, araşdırmalar davam etdirilir.
Azərbaycan Milli Elmlər Akademiyasının AMEA-nın Biofizika İnstitutu və Səhiyyə Nazirliyinin Milli Onkologiya Mərkəzi ilə birgə işlənilib hazırlanan süni intellekt vasitəsilə onkoloji xəstələri müəyyən edə bilən yeni metod hazırlayıb.
“Qafqazinfo”nun Trend-ə istinadən məlumatına görə, AMEA-nın Biofizika İnstitutunun direktoru, AMEA-nın müxbir üzvü Oktay Qasımov deyib ki, onkoloji və neyrodegenerativ xəstəliklər müasir biotibbin ən prioritet istiqamətlərindəndir. İqtisadi cəhətdən inkişaf etmiş əksər ölkələrdə ölüm səbəblərinin strukturunda bədxassəli şişlərin 18-23 faizlə ikinci yeri tutduğunu deyən Qasımov dünya əhalisinin təxminən 10 faizinin yaşla əlaqəli neyrodegenerativ xəstəliklərdən əziyyət çəkdiyini əlavə edib:
“Bu xəstəliklərin hər birində genetik, stress və başqa amillər mühüm rol oynayır. Bu çox amilli xəstəliklərin yaratdığı tibbi-sosial problemləri həll etmək üçün yeni innovativ, multidissiplinar yanaşmaların tətbiqinə böyük ehtiyac var”.
Məruzəçi xəstəliklərin başlanğıc mərhələsini aşkar edə bilən yeni skrininq metodların tətbiqinin vacib olduğunu xüsusi qeyd edib. Vurğulayıb ki, bu yanaşma həm xəstələrin yaşama müddətinin və sağalma ehtimalının artması, həm də iqtisadi səmərəlilik nöqteyi-nəzərindən mühüm əhəmiyyət kəsb edir.
O.Qasımov Biofizika İnstitutu və Milli Onkologiya Mərkəzi ilə birgə işlənilib hazırlanan süni intellekt vasitəsilə ağciyər xərçənginin proqnozu üzrə aparılan işlərin uğurlu nəticələr verdiyini söyləyib: "Maşın öyrənməsi" fazasında sağlam və xəstə insanların qan plazmaları Furye Çevirici İnfraqırmızı spektrləri multivariat statistika vasitəsi ilə təsnif olunub, onun icrası yoxlanılıb, lazım gəldikdə optimallaşdırılıb. Maşın bu biliklərdən istifadə etməklə naməlum nümunələri multivariat statistika vasitəsi ilə təsnif edib proqnoz verir. İşlənib hazırlanan sistem sağlam insanları 80 faizə, ağciyər xərçəngi olan xəstələri isə 90 faizə qədər dəqiqliklə təyin edə bilir. Bu tədqiqatları davam etdirmək və maşın biliyinin həcmini artırmaqla təsnifatı daha da təkmilləşdirmək zəruridir".
O.Qasımov bildirib ki, bu gün tibbdə müasir çağırışlara cavab olaraq, fərdi təbabət istiqamətini inkişaf etdirmək üçün AMEA-nın Biofizika İnstitutunda hüceyrə texnologiyaları bazasının yaradılmasına ehtiyac var.
“Hesab edirəm ki, yaşayış minimumu rəqəmi mütləq artacaq”.
Bunu “Yeni Müsavat” qəzetinə müsahibəsində millət vəkili Hadi Rəcəbli deyib.
Deputat qabaqcadan bunun proqnoz verib: “Bizim istədiyimiz yaşayış minimumunun reallıqlara daha məqbul, yaxın olmasıdır. Statistika Komitəsi ilə İqtisadi İnkişaf Nazirliyi birgə bazardakı qiymətlərlə, reallıqlarla, rəqəmləri ölçüb-biçməklə yaşayış minimumu göstəricisini müəyyənləşdirirlər. Mən bunu xüsusi vurğulamaq istərdim ki, beynəlxalq standartlara uyğun olaraq məhz yaşayış minimumu bizə təqdim olunur. Bizim də onlarla mübahisə etməyə sözümüz qalmır, çünki onlar dünya standartlarını, digər məsələləri əsas götürürlər. Bizə də daim deyirlər ki, bu hesablamalar axı minimumdur”.
Yaşayış minimumu neçə manata qaldırılacağı ilə bağlı da danışan H. Rəcəbli qeyd edib ki, bu rəqəm ən aşağısı 200 manat ola bilər: “Mümkündür bundan da çox olsun. Nə üçün? Bu gün real bazar qiymətlərinin hesablanması və istehlak səbətinin standartları var. Yəni neçə kalori nə yeyilməlidir, nə geyilməlidir, digər məsrəflər və s. Biz deyirik ki, gəlin bu standartdan da bir az kənara çıxaq, istehlak tələbatını bir az yüksək götürək, nə olar?”
Millət vəkili yenidən minimum əmək haqqı arta biləcəyini deyib: “Ehtimal var ki, artsın. Onu biz indi deyə bilmərik, gələn ilin fevralında deyiləcək. Lakin mən təminat verirəm onun da artım ehtimalı var. Yaşayış minimumu və minimum əmək haqqının artması ehtimalı var. Bugünkü büdcənin müzakirələri bir daha onu göstərir. Digər tərəfdən, büdcəyə daxil olan əlavə, real məbləğlər, gömrükdən, vergidən daxil olan vəsaitlər, Sosial Sığorta Fondunun özünün yığım imkanlarının artması… Görürsünüz, onlar son 5 ayda əlavə 350 milyon vəsait toplamışdılar. Buna görə də biz onlar üçün dövlət büdcəsindən ayrılan dotasiyasını azaltdıq. Düşünürəm ki, ilin sonunadək də bu artım yüksələcək, gələn il üçün də bu ehtimallar var. Əgər biz Sığorta Fondunu dotasiyadan azad etsək – biz ora 1,5 milyard əlavə pul veririk – hətta biz onları yarıbayarı bu vəsaitdən azad etsək, o vəsait yenə də adamlarımıza qayıdacaq”.
Xəzər dənizi sanki “boğulur”. Çünki Abşeron yarmadası ərazisində sahil boyu uzanan hasarlarla əhatələnib.
Minval.info xəbər verir ki, məsələ barədə İctimai Televiziya maraqlı sujet hazırlayıb.
Kanalın hazırladığı sujetdə bildirilib ki, dəfələrlə məsələ barədə tənqidi fikirlər səslənsə də, bu qanunsuz əməllər hələ də davam edir.
Bakı şəhər İcra Hakimiyyətinin Ticarət və xidmət departamentinin əməkdaşı Bayram Həsənov bildirib ki, hasarların sökülməsilə bağlı sahibkarlara məlumatlar verilib.
“Yəqin ki, yaxın gələcəkdə kompleks işlər görüləcək. Bakı şəhər İcra Hakimiyyəti ilə yanaşı Fövqəladə Hallar Nazirliyinin və digər inzibati orqanlarının əməkdaşları da bu işdə iştirak edəcəklər. Bəzi yerlərin özəlləşdirildiyi üçün bu məhkəmə işidir”, – deyə Bayram Həsənov bildirib.
Baş Dövlət Yol Polisi İdarəsi avtomobil sahiblərinə müraciət edib.
Minval.info xəbər verir ki, idarədən APA-ya verilən məlumata görə, bir çox hallarda avtomobil sahibləri təmir və ya avtoyuma məntəqələrinin xidmətlərindən istifadə edərkən nəqliyyat vasitəsinin açarlarını da məntəqə işçilərinə verərək oranı tərk edirlər.
Belə hallar isə bəzən həmin məntəqələrdə çalışan və adətən gənc, hərəkətlərinin məsuliyyətinin fərqinə varmayan bir sıra insanlara sahibi yanında olmayan nəqliyyat vasitələrindən qanunsuz istifadə etmək fürsəti yaradır:”Müştərilərin etibarından sui-istifadə etməklə yanaşı, qanunvericiliyin də tələblərini kobud şəkildə pozaraq onlara həvalə edilmiş avtomobili qaçıraraq idarə edən belə gənclər tərəfindən bir sıra hallarda insanların həlak olması, yaralanması ilə nəticələnən ağır yol-nəqliyyat hadisələri törədilir.
Bununla yanaşı, bəzən xidmət göstərməli olduqları nəqliyyat vasitələrindən oğurluq edən, onlardan öz əmlakı kimi istifadə edən şəxslərə də rast gəlinir.
Odur ki, avtomobil sahiblərinə müraciət edərək tövsiyə edirik ki, təmir və ya avtoyuma məntəqələrinin xidmətlərindən istifadə edərkən mümkün qədər məntəqəyə yaxın ərazidə olmağa çalışın, avtomobilinizi təsadüfi deyil, tanıdığınız, məsuliyyətli, peşəkar insanlara etibar edin”.
Bu ilin yanvar-may aylarında əhalinin sayı 31676 nəfər və ya 0,3 faiz artaraq, 2019-cu il iyunun 1-i vəziyyətinə 10 013 133 nəfərə çatıb.
Bu barədə Dövlət Statistika Komitəsinin məlumatında deyilir.
Bu ilin beş ayı ərzində Ədliyyə Nazirliyinin rayon (şəhər) qeydiyyat şöbələri tərəfindən 56 254 doğulan körpə qeydə alınıb. Əhalinin hər 1000 nəfərinə bu göstərici ötən ilin müvafiq dövrü ilə müqayisədə dəyişməyərək, eyni səviyyədə (13,7) qalıb. Körpələrdən 1238-i əkiz, 36-sı isə üçəm doğulanlardır.
Yanvar-may aylarında ölkədə 24 690 ölüm halı qeydə alınıb. Ötən ilin müvafiq dövrü ilə müqayisədə, əhalinin hər 1000 nəfərinə ölüm səviyyəsi 6,2-dən 6,0-a düşüb.
Tətil haqqında planlar qurmağa başlayanda gedəcəyimiz yerlə birgə nəqliyyat vasitəsini də seçirik.
Bizim üçün tətil ölkəsi Türkiyə idi, hər şeyi təyin etdik, planımızı qurduq. Təyyarə ilə getmək büdcəmizə uyğun gəlmədi. Məlumdur ki, ölkəmizdə təyyarə biletləri anormal şəkildə bahadır. Buna görə də, nəqliyyat vasitəsi kimi avtobusu seçdik.
Dost məsləhəti ilə “Öz Hasanoğlu” şirkətindən istifadə etmək qərarına gəldik. Səfər günü gəlib çatdı. Şirkətin nümayəndəsi avtobusun yanında bizimlə görüşdü, ödənişi aldı, amma biletləri təqdim etmədi. “Biletləri bir azdan yazıb gətirəcəyəm” dedi, amma sona qədər biletlər ortalıqda görünmədi.
Sadəcə bizə yox, avtobusda olan heç bir sərnişinə bilet verilməmişdi. Düşünün ki, Azərbaycandan Türkiyəyə şirkət avtobusu ilə yol gedirsən, amma biletin yoxdur. Yolda hər hansı bir hadisə baş verərsə avtobusda kimlərin olduğu, hansı oturacaqda əyləşdiyi bəlli olmayacaq. Yolda da bilet olmadığı üçün yetərincə yer davası oldu. Azərbaycan vətəndaşının yerindən qaldırılması, yerində Türkiyə vətəndaşının əyləşdirilməsi, etiraz edəni avtobusdan düşürməklə hədələmək və s.
“Öz Hasanoğlu”nun “oyunları” bununla da bitmədi. Avtobusu idarə edən və Türkiyə vətəndaşı olan Adəm adlı şəxs yolboyu sərnişinlərlə dalaşır, qışqırır, ən kobud şəkildə rəftarı ilə seçilirdi. Hətta bir azərbaycanlı qadının yerini zorla dəyişməyə çalışması tərəflər arasında mübahisəyə səbəb oldu. Qadının üzərinə dayanmadan qışqırması eyni tərzdə iradımdan sonra dayandı.
Daha öncə bəlkə də çobanlıq etmiş sürücü avtobusda insan daşıdığını, bağırmaqla işinin keçməyəcəyini bilmirdi. Səfərimiz 45-48 saat çəkdi. Bu müddət ərzində təbii ki, sərnişinlərdən kiminsə halı pisləşə bilər, təbii ehtiyacı üçün 5 dəqiqə avtobusu saxlamağı istəyə bilər. Amma sürücü hər dəfə bağırmağa davam edirdi. Baxmayaraq ki, yolda yük götürmək üçün istədiyi yerdə saxlayırdı. Narazılıq edən sərnişinə də, “Düş mənim avtobusumdan. Xoşun gəlmir, getmə” deyən Adəm adlı şəxs, həqiqətən də düz deyirmiş. Öyrəndim ki, avtobus onun özünə məxsusdur, sərnişinlərə xidmət edən cavan oğlan da oğludur.
Ata və oğul elə buna görə özlərini məkanın ağası hiss edirmiş. Əsəbi, özünü idarə edə bilməyən ata və tərbiyədən uzaq oğul… Belə ki, kimsə avtobusda ayaqqabısını ayağından çıxardığı üçün pis qoxu yayılmışdı. Bu zaman atasından geri qalmadığını sübut etməyə çalışan oğul normal irad bildirmək yerinə, “Avtobusa kim öz nəcisini etdi?” deyərək bağırmağa başladı. Əslində cümlə daha iyrənc idi. Mənə olduğu kimi yazmağa tərbiyəm və KİV haqqında qanun imkan vermir. Təbii ki, yenə də günahkar “Öz Hasanoğlu” şirkətidir. Bir avtobus sərnişini belə normal olmayan şəxslərə etibar etmək onların ciddi xətasıdır.
Müştəri cəlb etmək üçün, “Avtobuslarımızda yolboyu izləmək üçün hər oturacağa monitor quraşdırılıb” deyən şirkət deyəsən bu xidmətlərinin də normal olmadığını bilmir. Çünki monitorların böyük hissəsi işləmirdi. Bundan əlavə, bu sistemdən istifadə etmək üçün qulaqcıq lazımdır. Bunu da şirkət verməlidir, amma verilmir. Səbəb kimi də qadağan olunduğunu deyirlər. Təklif edilən wi-fi sistemi də şirkət kimi idi. Var idi, amma normal çalışmırdı. Bir təhər gedib Bursaya çatdıq. Geri dönən zaman da başqa şirkətdən bilet tapmadığımız üçün məcbur “Öz Hasanoğlu”dan istifadə etməli olduq. Bu dəfə də ayrı problemlərlə qarşılaşdıq. Bu dəfə sürücülərlə heç bir problem yaşamadıq. Ümumiyyətlə sürücü sərnişinlə dialoqa girmirdi, sakit, işini görürdü. Doğrusu da budur.
Bu dəfə problem fərqli idi. Belə ki, Bakıdan gedərkən 2 yaşlı qızım üçün şirkət bilet qiymətinin yarısını istədi. Eyni şirkətlə Bakıya dönən zaman isə tam bilet üçün ödəniş istənildi. Görünür şirkətdə dərəbəylikdir. Kim hansı qiyməti istəsə təyin edir. Birtəhər danışıb, 30 dollar ödəyib, qızım üçün bileti aldım. Bundan sonra bizi daha bir sürpriz gözləyirmiş.
Belə ki, Bursadan Bakıya getmək üçün bilet alsaq da, verilən biletdə bizim Batumiyə getdiyimiz yazılmışdı. Biletin qiyməti də 200 TL olaraq qeyd edilmişdi. Hansı ki, biz bu səfər üçün 260 TL vermişdik. Şirkət deyəsən vergidən yayınmaq üçün bu yollara əl atır. Gah bilet satmır, gah da biletdə saxtakarlıq edir.
Bu səfər haqqında yazmağa qərar verməyimin səbəbi var. “Öz Hasanoğlu”nun “yüksək” xidmətlərindən istifadə etmədən öncə bir neçə dəfə düşünün. Uzun yol gedəcəksiniz, daha peşəkar şirkətlərin xidmətlərindən istifadə edin ki, oxşar və ya daha betər problemlərlə üzləşməyəsiniz.
Məhəmməd Türkmən
Minval.info