 |
 |
2022-ci ildən etibarən Azərbaycanda “Avro-5” markalı benzin istehsal olunacaq.
Bunu Prezident İlham Əliyev fevralın 18-də Bakı Nəqliyyat Agentliyinin İdarə Heyətinin sədri Vüsal Kərimlini qəbul edərkən deyib.
“Növbəti illərdə avtobus parkının təzələnməsi istiqamətində əlavə tədbirlər görüləcək və eyni zamanda, şadam ki, hazırda ölkəmizə gətirilən yeni avtobuslar ekoloji cəhətdən çox təmizdir. Çünki sirr deyil ki, havanı ən çox çirkləndirən nəqliyyat vasitələridir. Ona görə həm iki ildən sonra Azərbaycanda istehsal olunacaq “Avro-5″ markalı benzinin bazara daxil olması bu sahədə çox böyük irəliləyişə səbəb olacaq”, – deyə dövlət başçısı bildirib.
Ölkəmizdə “Avro-5” markalı benzinin istehsalı ilə bağlı Azərbaycan Dövlət Neft Şirkətinin (SOCAR) İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov deyib ki, SOCAR-ın Heydər Əliyev adına Neft Emalı Zavodu regionun yeganə neftayırma kompleksidir və Azərbaycanın yanacağa olan tələbatının əsas hissəsini təmin edir:
“Zavodda 15 adda neft məhsulu, o cümlədən avtomobil benzini, təyyarə yanacağı, dizel yanacağı, mazut, neft koksu və s. istehsal olunur. Heydər Əliyev adına Neft Emalı Zavodunda yenidənqurma və modernizasiya layihəsi çərçivəsində artıq 2021-2022-ci illərdə Azərbaycanda “Avro-5” standartına cavab verən dizel və benzin yanacağının istehsal olunması nəzərdə tutulur. 2024-2025-ci illərdə isə istehsalat həcminin 7,5 milyon tona qədər artırılması istiqamətində aparılan işlərin də başa çatdırılması planlaşdırılıb. Zavodun modernizasiyası ölkə daxilində “Avro-5″ keyfiyyət standartına uyğun olan yanacağın istehsalını təmin etməyə və istehsalın illik həcmini artırmağa imkan yaradacaq”.
Neft Araşdırmaları Mərkəzinin rəhbəri İlham Şaban deyib ki, 1992-ci ildən etibarən dünyada ekoloji mühitin yaxşılaşdırılması məqsədilə avtomobil mühərriklərindən atmosforə atılan zəhərli maddələrin miqdarını tənzimləmək üçün bütün nəqliyyat vasitələrini xarakterizə edən ekoloji standartların tətbiqinə start verilib:
“Qaydalara uyğun olaraq, avtomobillər tərəfindən atmosferə atılan zərərli maddələrin miqdarının azaldılması ilə səciyyələnən 6 növ “Avro” standartı mövcuddur. Standartın adında göstərilən nömrə (1, 2, 3, 4, 5 və 6) nə qədər yüksək olarsa, həmin sandartların tələblərinə cavab verən avtomobilin istismar zamanı ətraf mühitə atılan zərərli maddələrin miqdarı bir o qədər azdır. “Avro-1” ekoloji standartı 1992-ci ildən Avropa, ABŞ və Yaponiyada tətbiq edilməyə başlamaqla dünyada ekoloji vəziyyətin yaxşılaşdırılması uğrunda atılmış ilk addım sayılır. “Avro-1″ ekoloji standartı dörd il hüquqi qüvvədə olub”.
Ekspert qeyd edib ki, “Avro-2” ekoloji standartı 1996-cı ildə “Avro-1” ekoloji standartını əvəz etməklə həm yanacaqların keyfiyyətinə, həm də dizel və benzin mühərriklərindən ətraf mühitə atılan zərərli maddələrin miqdarına olan tələblər nəzərə çarpacaq dərəcədə sərtləşdirildi:
“Bu standartların tətbiqi ilə karbürator tipli mühərriklər erası başa çatmış oldu və onları birbaşa püskürməli (injektor tipli) mühərrikli nəqliyyat vasitələri əvəz etdi. 2000-ci ildə isə Avropada avtomobil mühərriklərindən atmosferə atılan zərərli maddələrin buraxıla bilən miqdarını 30-40%-ə qədər azaldılmasını tələb edən yeni “Avro-3” ekoloji standartının tətbiqinə başlanıldı. 2005-cı ildə tətbiqinə başlanılmış “Avro-4″ ekoloji standartı avtomobil mühərriklərindən atmosferə atılan zərərli maddələrin buraxıla bilən miqdarını əvvəlki standartla müqayisədə 65-70% sərtləşdirdi”.
O bildirib ki, “Avro-5” ekoloji standartı Avropada artıq 2009-cu ildən tətbiq olunmağa başlayıb və standartın tələbləri bu gün həyati zərurətə çevrilib:
“Avro-5″ standartlı yanacağın istifadəsi avtomobilin işlənmiş qazının tüstüsünü və yanma məhsullarının (bərk hissəciklər, azot oksidləri, karbonmonoksit, yanmamış karbohidrogenlər) ətraf mühitə tullanmasını kifayət qədər azaldır. Bundan əlavə, bu standartda yanacağın istifadəsi zamanı yanacağın maksimal dərəcədə yanması təmin edilir, mühərrikdə və yanacaq sistemində səs-küy və vibrasiya azalır, korroziya ehtimalı aşağı düşür, mühərriki işə salmağı asanlaşdırır, yanacaq istehlakını azaldır və avadanlıq ömrünü uzadır”.
“2014-cü ildən etibarən isə Avropada avtomobil mühərriklərindən atmosferə atılan zərərli maddələrin miqdarına “Avro-6″ ekoloji standartının tətbiqinə başlanılıb. 2015-ci ildən bu günə qədər istehsal edilmiş bütün avtomobillərə mütləq qaydada şamil edilən bu standarta əsasən, zərərli maddələrin atmosferə atılması əvvəlki standartla müqayisədə 67% azalır”, – deyə o vurğulayıb.
Əhmədov bildirib ki, standartlara görə təyin olunan hər növ yanacaq yanma zamanı atmosferə buraxdığı zərərli maddələrin miqdarı və tərkibinə görə fərqlənir:
“Standartın adında göstərilən sıra nömrəsinin artması yanacağın keyfiyyətinin yüksəlməsinin göstəricisidir. Bu halda onun istifadəsi ətraf mühitə, avtomobilin mühərrik və yanacaq sisteminə daha az zərər verməsi ilə yanaşı, avtomobilin istismar keyfiyyətlərinin tam olaraq əldə edilməsinə şərait yaratmış olur”. /Sputnik Azərbaycan/
Yanvar ayı ərzində Bakıda kirayə mənzillərin qiyməti bahalaşıb.
Bu barədə trend-ə daşınmaz əmlak sahəsində ekspert Nüsrət İbrahimov deyib.
N.İbrahimov bildirib ki, ay ərzində Bakıda kirayə mənzil bazarında qiymət 5.62 faiz artıb, ötən ilin müvafiq dövrü ilə müqaysədə isə artım 14.35 faiz təşkil edib:
"Ticarət obyektlərinin icarəsində isə ay ərzində 5.15 faiz azalma, il ərzində isə 4.8 artım müşahidə olunub. Kirayə mənzillərin qiymətinin artması ölkəyə turist axını ilə bağlı olub. Yanvar ayı ərzində bayramla əlaqədar ölkəyə çoxlu sayda turist gəldiyi üçün qiymət artımı müşahidə edilib".
Ekspert əlavə edib ki, növbəti aylarda kirayə mənzil bazarında qiymətlərin aşağı düşəcəyi gözlənilir.
Martın 9-da keçirilməsi nəzərdə tutulan 9-cu sinif buraxılış imtahanı həmin gün baş tutmayacaq.
Dövlət İmtahan Mərkəzindən "Report"a verilən məlumata görə, koronavirus (COVİD - 19) infeksiyasının Azərbaycan ərazisində yarada biləcəyi təhlükənin qarşısının alınması məqsədilə həyata keçirilən təxirəsalınmaz tədbirlərə uyğun olaraq yoluxma hallarının qarşısının alınması, bu sahədə aparılan müvafiq profilaktik tədbirlərin effektivliyinin yüksəldilməsi məqsədilə qeyd olunan tarixdə keçirilməsi planlaşdırılan imtahan təxirə salınıb.
Bu istiqamət üzrə imtahanın vaxtı imtahanın keçiriləcəyi tarixdən 1 həftə öncə elan olunacaq.
Qeyd edək ki, 9 mart 2020-ci il tarixində Gəncə, Lənkəran, Şəki, Sumqayıt şəhərlərində, Abşeron, Ağdam, Ağstafa, Ağsu, Bərdə, Biləsuvar, Göygöl, İmişli, Kürdəmir, Lerik, Oğuz, Qazax, Qəbələ, Saatlı, Sabirabad, Samux, Şabran, Şamaxı, Tərtər, Tovuz, Xaçmaz, Yevlax, Zərdab rayonlarında yerləşən orta ümumtəhsil müəssisələrinin 9-cu sinif şagirdləri üçün buraxılış imtahanının birinci mərhələsinin keçirilməsi nəzərdə tutulmuşdu.
Azərbaycan hökumətinin koronavirus (COVİD - 19) infeksiyasının Azərbaycan ərazisində yarada biləcəyi təhlükənin qarşısının alınması məqsədilə təxirəsalınmaz tədbirlər məqsədi ilə təhsil müəssisələrində təhsilin müəyyən müddətə qədər dayandırılması təqdir olunası və vaxtında atılan addımdır.
Bunu “Ölkə.Az”a açılamasında Səhiyyə nazirliyinin baş infenksionisti Cəlal İsayev deyib.
Onun sözlərinə görə, respublikamızda koronavirusa yoluxma halları az olsa da, qonşu ölkələrdə, xüsusən də İranda bu virusa yoluxma halı artmaqdadır.
“Qonşu ölkədə vəziyyət gərgin olaraq qalır və belə bir şəraitdə Azərbaycanda təhsil ocaqlarında təhsilə ara verilməsi məqsədi ilə belə bir qərarın verilməsi müsbət və vaxtında verilən qərardır. Mən bunu müsbət qərar hesab edirəm. Çünki, bu qərar profilaktik addım olduğundan həm mövcud gərginliyin qarşısının alınmasına, həm də virusun ölkəmizdə ehtimal olunan yayılma hallarının qarşısını almağa xidmət edəcək”- C.İsayev deyib.
Bu ilin yanvarında Əfv Məsələləri Komissiyasının üzvləri Novruz bayramı ərəfəsində əfv sərəncamının veriləcəyinin gözlənildiyini bildirsələr də, 2020-ci il daxil olandan iclas keçirilməyib. Komissiya üzvlərinin deyildiyi kimi nöbdənəkənar parlament seçkilərindən dərhal sonra toplaşmaması isə əfvə olan ümidləri bir az azaldıb.
Komissiyadan BakuPost.az-a daxil olan məlumata görə, fevralın 9-da ölkədə keçirilən növbədənkənar parlament seçkiləri sərəncamın yubanmasına səbəb olub.
Həmçinin buna qədər həm də Əfv Məsələləri Komissiyasının sədrilə bağlı Prezident tərəfindən sərəncamın veriləcəyi, üzvlərin yeni siyahısının təsdiqlənəcəyi qeyd edilib.
Bir qayda olaraq, Azərbaycan Respublikası Prezidentinin Administrasiyasının rəhbəri Əfv Məsələri Komissiyasının sədri təyin olunur. Xatırladaq ki, Prezident İlham Əliyevin 1 noyabr 2019-cu il sərəncamı ilə Samir Nuriyev Prezident Administrasiyanın rəhbəri təyin edilib.
Bütün bunlardan sonra isə əfv sərəncamının may ayınadək ertələnəcəyi bildirilib.
Qeyd edək ki, Prezident İlham Əliyevin 2019-cu il martın 16-da imzaladığı 431 nəfərə şamil olunan “Məhkum edilmiş bir sıra şəxslərin əfv olunması haqqında” sərəncamla 399 nəfər cəzasının çəkilməmiş hissəsindən azad edilib.
Bundan başqa, ömürlük azadlıqdan məhrum etmə cəzasına məhkum edilmiş üç nəfərdən birinin cəzası 25, iki nəfərinki isə 20 il müddətə azadlıqdan məhrum etmə cəzası ilə əvəzlənib. Azadlıqdan məhrum etmə cəzasına məhkum olunan və cəzasının çəkilməsi təxirə salınmış bir nəfər cəzadan azad edilib.
Həmçinin azadlıqdan məhrumetmə cəzasına şərti olaraq məhkum edilmiş 11 nəfər cəzadan, eləcə də azadlığın məhdudlaşdırılması cəzasına məhkum edilmiş bir nəfər cəzasının çəkilməmiş hissəsindən azad edilib. Üç nəfər islah işləri cəzasından, bir nəfər ictimai işlər cəzasından, 12 nəfər isə cərimə cəzasından azad olunub.
“Koronavirus epidemiyası ilə bağlı mübarizə ilk gündən diqqət mərkəzindədir. Artıq yüzlərlə məktəbdə dezinfeksiya işləri aparılıb və proses növbəti günlərdə də davam edəcək”.
Bunu Təhsil Nazirliyinin İctimaiyyətlə əlaqələr sektorunun müdiri Cəsarət Valehov deyib.
O bildirib ki, məktəblərdə fəaliyyət göstərən qərargaha toplanan müvafiq məlumat təhlil olunur və nəticələr barədə qərar qəbul edilir.
Nazirlik rəsmisi eyni zamanda məktəblərdə təhsilin dayandırılması ilə bağlı fikirlərə də münasibət bildirib: “Hələlik bu barədə heç bir qərar verilməyib. Mövcud vəziyyət müzakirə edilir və bu barədə hər hansı qərar qəbul edilərsə ilk növbədə mətbuat məlumatlandırılacaq”. (report)
Nazirlər Kabineti Dərman vasitələrinin və tibbi ləvazimatların alınması üçün dövlət büdcəsində nəzərdə tutulmuş Ehtiyat Fondundan vəsait ayrılması barədə qərar verib.
Bununla bağlı Baş Nazir Əli Əsədov sərəncam imzalayıb.
Sərəncamla dərman vasitələrinin və tibbi ləvazimatların alınması üçün Azərbaycan Respublikasının 2020-ci ilin dövlət büdcəsində nəzərdə tutulmuş Ehtiyat Fondundan 10 milyon manat məbləğində vəsait ayrılıb.
Maliyyə Nazirliyinə bu sərəncamın 1-ci hissəsi ilə ayrılan vəsaitin müvafiq qaydada ödənilməsini təmin etmək tapşırılıb.
Bu Sərəncam imzalandığı gündən qüvvəyə minir.
Bakı Şəhər İcra Hakimiyyəti (BŞİH) paytaxtda müşahidə olunan küləklə əlaqədar sakinlərə və sürücülərə xəbərdarlıq edib.
BŞİH Yaşıllaşdırma Təsərrüfatı Birliyinin Bitkilərin mühafizəsi şöbəsinin rəisi Orxan Məmmədov Trend-ə bildirib ki, hazırda əsən güclü külək ağacların aşma ehtimalını artırır:
"Güclü külək hətta sağlam ağacları da aşıra bilər. Buna görə də sürücülərdən xahiş edilir ki, maşınlarını ağacların altında saxlamasınlar. Sakinlərə isə ağacların altında dayanmamaq və ehtiyatlı olmaq məsləhət görülür".
Yağışlı hava şəraiti ilə əlaqədar Bakının Heydər Əliyev prospekti - Hava limanı və Zığ yolu - Hava limanı avtomagistrallarında bütün zolaqlar üzrə sürət həddi müvafiq olaraq endirilib.
Bu barədə Bakı Nəqliyyat Agentliyindən bildirilib.
Məqsəd bu cür hava şəraitində hərəkətin təhlükəsizliyini təmin etməkdir.
Sürücülərə hərəkətdə olan zaman sürət həddinə əməl etmələrini və meteoroloji amilləri nəzərə almalarını tövsiyə edirik.
Çində yayılan koronavirusa görə bir çox dövlətlərin bu ölkə ilə sərhədlərini bağlaması, ixracatın minimuma endirilməsi Azərbaycan bazarlarında da öz təsiri göstərməkdədir.
Musavat.com-un əməkdaşları paytaxtın mobil telefon mağazalarına baxış keçirərkən Çin istehsalı olan malların həm qiymətlərinin bahalaşdığını, həm defisit yarandığını görüb.
Hazırda şəhərin əksər tanınmış elektronika satılan mağazalar şəbəkələrində Çin malı olan "Xiaomi" və "Huawey" modellərinin qiymətlərində dəyişiklik müşahidə olunur.
Xüsusən də "Xiaomi" mobil telefonlarının "Redmi Note 7" və "Redmi Note 8" seriyalarına tələbat artıb. Ona görə də mağazalarda bu model telefonlar demək olar ki, qalmayıb.
Bakının Bülbül prospektində yerləşən tanınmış mobil telefon mağazalarında, o cümlədən şəhərin müxtəlif yerlərində fəaliyyət göstərən şəbəkələrdə apardığımız kiçik reyd zamanı məlum oldu ki, yuxarıda adını çəkdiyimiz modellər ya bir-iki ədəd qalıb, ya da heç yoxuydu.
Satıcların sözlərinə görə, Çin malı olan "Xiaomi"nin sözügedən seriyaları artıq idxal edilmir, bu da qiymətlərin qalxmasına səbəb olub.
Öyrəndik ki, "Redmi Note 7" seriyasının 32 giqabayt həcmdə olanların nağd qiyməti 360-380 manatdır.
İntəhası, bir tərəfdən bu gücə malik telefonlar elə də keyfiyyətli olmur, donmalar yaranır, yüklənir, digər tərəfdən isə mağazalarda artıq tapmaq mümkün deyil.
Odur ki, müştərilər daha çox "Redmi Note 7" seriyasının 64 giqabayt potensiala malik modellərini axtarırlar. Bu məhsullar isə demək olar ki, defisitdir.
Mağazada çalışanlar deyirlər ki, Çindən artıq həmin telefonlar gəlmir, onların istehsalı bitir, tələbat isə çoxalıb. Nəticədə qiymətlərə təsir edir.
Bu telefonların "Redmi Note 8" modellərinin isə 32 giqabayt olanları 450 manatdan başlayırdı, 64 giqabaytlıqlar 500 manatdan aşağı tapılmırdı, o da tapılsa...
Satıcılar deyirlər ki, depolarda az sayda həmin model telefonlardan qalıb. Proqnozlara görə, ayın sonuna kimi Bakıda bu seriyaları tapmaq mümkün olmayacaq.