 |
 |
Azərbaycan Respublikasının Prezidenti İlham Əliyev oktyabrın 7-də Türkdilli Dövlətlərin Əməkdaşlıq Şurasının Baş katibi Bağdad Amreyevi qəbul edib.
Son vaxtlar Milli Məclis üzvlərinin deputata maaşları ilə əldə etmələri inandırıcı görünməyən, ölçüyəgəlməz sərvətləri, malik olduqları nəhəng kapitalları üzə çıxır. Rəfael Cəbrayılovun 300 min manat borc qarşılığında deputat vəsiqəsini girov qoyması ilə bağlı xəbərlərinin yayılması və ardından deputat mandatından məhrum edilməsi isə əsl sensasiya oldu. Və deyəsən, bu sensasiyalar seriyası hələ çox davam edəcək. Sırada Milli Məclisin işçiləridir.
Sabiq deputat, hazırda Milli Məclisin Birləşmiş Həmkarlar İttifaqları Konfederasiyasının sədri işləyən Qafarov Rəfael İbrahim oğlunun keçmiş yeznəsi (bacısının keçmiş həyat yoldaşı) Quliyev Rafiq Qafar oğlu Azerinfo.az saytına müraciət edərək, Rəfael Qafarovun ona qarşı dələduzluq cinayəti törədərək külli miqdarda maddi ziyan vurmasından şikayətlənmiş, düçar olduğu problemin ictimailəşdirilməsini redaksiyadan xahiş etmişdir.
Rafiq Quliyev yazır: "Rəfael Qafarov mənim Rusiya Federasiyasında olmağımdan istifadə edərək onunla birgə şəriki olduğum yanacaqdoldurma məntəqəsinin büdcəsini, mayasını, qazancını, habelə, mənə məxsus "Kamaz" markalı benzindaşıyan yük maşınını sataraq pulunu mənimsəmişdir. Bundan başqa, əldə etdiyi gəlirləri vergidən gizlədərək, dövlətə də ziyan yetirmişdir. Bütün bunlar azmış kimi, Rəfael Qafarov Bakı şəhəri Binəqədi rayonu Azadlıq prospekti - 167 ünvandakı 18 nömrəli mənzilimi lombarda girov qoyaraq 56000 (əlli altı min) manat məbləğdə pul götürüb və həmin pulun 40000 (qırx min) manatını Səbail Rayon Polis İdarəsinin sabiq rəis müavini Füzuli Hümbətova oğlum Orxanın əli ilə verərək, ona olan borcunu qaytarıb. Oğluma bir həftə müddətində mənzili lombarddan çıxaracağına söz verib. Amma artıq 5 ildən çoxdur ki, ev lombarddadır..."
Şikayətçi bildirir ki, Vətənə qayıdandan sonra Rəfael Qafarovdan mənzili girovdan çıxarmasını və yanacaqdoldurma məntəqəsinin mühasibat sənədlərini tələb edib: "Ona xatırlatdım ki, müəssisənin həmtəsisçisi, şəriki, həm də mühasibiyəm. Lakin Rəfael Qafarov mənim tələbimi yerinə yetirmək əvəzinə məni döyməyi öz adamlarına sifariş etdi. Onlar - üç nəfər məni iş yerimdə ölümümə döydülər. Özümdən gedib asfaltın ortasında yıxılıb qaldım. Yoldan keçən şəxs oğlumun dostuna zəng edib və mənim nə vəziyyətdə olduğumu, təcili yanacaqdoldurma məntəqəsinə gəlməsinin vacibliyini deyib. Özümə gələndən sonra gördüm ki, dizimdən başıma qədər, qollarım da daxil olmaqla az ağır xəsarətlər almışam. Sağ qolum isə çiynimdən çıxıb. Rəfael Qafarov kimi əslən Qərbi Azərbaycandan olan, onunla uzun illər dostluq edən Sabirabad polisinin təhqiqatçısı Möhlət Bayramov döyülmə işini təhqiq edərkən, məni döymüş adamların sayını gizlətdi, üç nəfər əvəzinə bir nəfər qeyd etdi və həmin adam həbs olunmadı. Adı rüşvət qalmaqallarında hallanan Möhlət Bayramov cinayətləri ört-basdır etməklə əldə etdiyi fantastik gəlirlər hesabına rayon daxilində yeganə olan eksklüziv bahalı avtomobil sürür. Onun qol damarlarının kəsik-kəsik olması isə ya kriminal aləmin mənsubları ilə oturub-durması, ya da psixi durumunun yerində olmaması barədə düşünməyə əsas verir... Mənim çoxsaylı şikayətlərimdən sonra Baş prokurorun birinci müavini Bakı şəhər prokuroruna göstəriş verdi ki, R.Qafarovun dələduzluq əməlinə hüquqi qiymət verilsin. Buna baxmayaraq, onun barəsində cinayət işi açılmadı. Sanki bütün hüquq-mühafizə, cinayət təqibi orqanları, nazirliklər, komitələr R.Qafarovun qarşısında aciz qalıblar. Müraciət etdiyim qurumlar mənə yayındırıcı cavablar verirlər. Vergilər Nazirliyindən mənə cavab yazıblar ki, R.Qafarov guya əlavə dəyər vergisini və peniyaları ödəyib. Lakin yanacaqdoldurma məntəqəsinin 2013-2017-ci illərdəki fəaliyyətini əks etdirən mühasibat göstəricilərini, hansı məbləğdə vergi ödədiyini konfidensiallığı əsas göstərərək bildirmədilər. Halbuki, mənim rəsmi təsisçi kimi bu məlumatları bilməyə hüququm çatır. Daxili işlər orqanlarında çalışan oğlumu da məhz R.Qafarovun sifarişi ilə polisdəki işindən azad etmişlər..."
Rafiq Quliyev qeyd edir ki, Rəfael Qafarovu müdafiə edən yüksək vəzifəli məmurları və deputatları tanıyır və onlar Qafarova qahmar çıxmaqda davam etsələr, adlarını çəkəcək, korruptiv əlaqələrinin, işbirliklərinin ilginc məqamlarını rəsmi KİV-də, sosial mediada açıqlayacaq.
Yeri gəlmişkən, Rafiq Quliyev və onun Sabirabaddan olan zərərçəkmiş qohumlarından ibarət bir qrup şikayətçi 03 oktyabr 2019-cu il tarixdə günorta saatlarında parlament binasının qarşısında toplaşaraq, Milli Məclisin sədri Oqtay Əsədovla görüşmək istəmiş, Rəfael Qafarovdan şikayətlərini spikerə bildirməyə cəhd etmiş, lakin buna nail olmamışlar. Onlara şikayətnamələrini məktublar qutusuna salmaq tövsiyə olunmuş, spikerin qəbuluna düşmələri üçün müəyyən vaxt təyin olunacağını bildirmişlər.
Lakin, Rafiq Quliyev onun malına, mülkünə əl qoyması barədə şikayətini ən yüksək səviyyədə dinlənilməyincə, problem çözülməyincə cəhdlərini davam etdirməkdə israrlıdır.
İbrahim Hümbətov
Göygöl Rayon Polis Şöbəsində üç nəfər işdən azad edilib.
"Ölkə.Az"ın məlumatına əsasən, bu barədə Daxili İşlər naziri, general-polkovnik Vilayət Eyvazov əmr imzalayıb.
Əmrə əsasən, əməliyyat işləri üzrə rəis müavini, polkovnik-leytenant Cavad Səfərəliyev, cinayət-axtarış bölməsinin rəisi Yasin İsmayılov, Sarısu Polis Bölməsinin rəisi Elşən Quliyev işdən çıxarılıb və sərəncama götürülüb.
Onların yerinə hələlik təyinat yoxdur.
“Biz cənab Prezidentin yürütdüyü aydın, qətiyyətli, prinsipial siyasətlə nə qədər qürur duyuruqsa, bir o qədər də Azərbaycan müxalifətinin qeyri-vətənpərvərliyinə görə hər zaman xəcalət çəkirik”.
"Ölkə.Az" xəbər verir ki, bu sözləri Prezidentin ictimai-siyasi məsələlər üzrə köməkçisi Əli Həsənov AzTV-də yayımlanan “Həftə” verilişində deyib:
“Prezident İlham Əliyev ona görə qətiyyətli, prinsipial siyasət yürüdür ki, bir tərəfdən xalqın dəstəyinə malikdir, ikinci tərəfdən bu dövlət özünü tam təmin edən, idarə edə bilən dövlətə çevrilib. 1994-cü il hadisələri zamanı Azərbaycan müxalifəti meydana çıxıb dövlətini, dövlətçiliyini müdafiə edən xalqın yanında yox, qarşısında oldular. 1994-cü ilin oktyabrında da, 1995-ci ilin martında da bu silahlı dəstələr Azərbaycan dövlətini Heydər Əliyevin ortaya qoyduğu milli birlikdən çəkindirmək istəyirdi. Azərbaycanı dünyada öz fikrini müstəqil söyləmək imkanından məhrum etmək istəyirdi.
“Əsrin kontraktı”nı pozmaq istəyirdilər. Təəssüf ki, bizim nə qədər vətənpərvər, iradəli, əzmli xalqımız var, bir o qədər də utancverici müxalifətimiz var. ATƏT-in bu yaxınlarda Varşavada keçirilən tədbirlərində yalnız Azərbaycan müxalifəti orada öz dövlətinin, xalqının, millətinin əleyhinə çıxış edirdi. Təəssüflər ki, biz bir tərəfdən əzmkar, iradəli, vətənpərvər xalq olmağımızla qürur hissi keçiririk, digər tərəfdən antixalq, qeyri-vətənpərvər müxalifətlə xəcalət hissi keçiririk”.
Britaniya, Almaniya və Fransa xarici işlər nazirləri İranın nüvə razılaşmasının saxlanılması üçün bu gün görüş keçirəcəklər.
Axar.az xəbər verir ki, bu məlumatı Finlandiyanın Avropa Birliyindəki Daimi Nümayəndəliyinin mətbuat xidməti yayıb.
Məlumata görə, görüş Helsinkidə qapalı rejimdə baş tutacaq. Görüşə AB-nin baş diplomatı Federika Moqerini də qatılacaq.
Bakı Şəhər Dövlət Yol Polisi İdarəsi (BŞDYPİ) paytaxt ərazisində yerləşən çimərliklərdə yeni aksiyaya start verib.
Day.Az xəbər verir ki, aksiya zamanı çimərliklərin girişinə BŞDYPİ tərəfindən hazırlanmış plakatlar vurulmaqla yanaşı, sürücü və digər hərəkət iştirakçılarına məlumatlandırıcı bukletlər paylanılıb.
Bukletlərdə avtomobili çəkələklə idarə etməyin, maşından küçə və yollara zibil atmağın, çimərlik ərazisində nəqliyyat vasitəsilə ilə təlim keçməyin, sərnişindaşıma qaydalarını pozmağın, spirtli içki qəbul edərək sükan arxasında əyləşməyin təhlükəli olması barədə bildirişlər qeyd olunub.
Sürücülərin bu qaydalara əməl etmələrinin vacibliyi öz əksini tapıb.
Suraxanı rayon ərazisində yerləşən çimərliklərdə yüzlərlə buklet paylanılıb. BŞDYPİ-nin və Suraxanı Rayon Dövlət Yol Polisi Şöbəsinin əməkdaşları tərəfindən sürücülərlə maarifləndirici söhbətlər aparılıb.
Daha sonra tədbir Səbail rayonu ərazisindəki Şıx çimərliyində davam etdirilib. Çimərliklərin girişinə plakatlar asılıb, bukletlər paylanılıb.
Bakı Şəhər Dövlət Yol Polisi İdarəsinin şöbə rəisi, polis polkovniki Vaqif Əsədov tədbirin əhəmiyyəti barədə bildirib ki, yay mövsümü ərəfəsində çimərliyə gələrək istirahət edənlərin təhlükəsizliyinin təmin olunması məqsədilə yol polisi tərəfindən tədbirlər həyata keçirilir.
Xüsusilə, Bakı şəhərinin inzibati ərazisinə düşən çimərliklərdə, onlara bitişik küçə və prospektlərdə yol polisi xidmət aparır.
Vaqif Əsədov qeyd edib ki, qaydaların pozulması nəticəsində baş verən yol qəza hadisələrinin qarşısının alınması üçün xüsusi işlər görülüb:
“Məlumat xarakterli bukletlər çimərliyə gələnlərə paylanılır. Eləcə də vətəndaşlar arasında maarifləndirmə işləri aparılır.
Bu gün Səbail rayonu Şıx çimərliyində və Suraxanı rayonu Hövsan qəsəbəsində yerləşən çimərliklərdə maarifləndirmə aksiyası keçirdik.
Sürücülərə nəqliyyat vasitələrini çəkələklə idarə etməyin təhlükəli tərəfləri, spirtli içkinin təsiri altında avtomobil idarə etməyin ölümə apardığı barədə məlumat verdik.
Xüsusi olaraq diqqətə çatdırdıq ki, çimərlik ərazisində nəqliyyat vasitələrindən təlim məqsədilə istifadə olunması da yolverilməzdir”.
Tədbirlər digər çimərliklərdə də davam etdiriləcək.
Zaqatala rayon Polis Şöbəsinin rəisi işdən çıxarılıb.
APA xəbər verir ki, bu barədə Daxili İişlər naziri, general-polkovnik Vilayət Eyvazov müvafiq əmr imzalayıb.
Əmrə əsasən, Zaqatala rayon Polis Şöbəsinin rəisi Adil Ələkbərov daxili işlər orqanlarında xidmət keçmənin son yaş həddi ilə əlaqədar təqaüdə göndərilib. Onun yerinə hələlik təyinat yoxdur.
Azərbaycan Rusiyaya nota verib.
Bu barədə APA-ya Azərbaycanın Rusiyadakı səfirliyindən məlumat verilib.
Bildirilib ki, bu ilin 9 avqust tarixindən Rusiyanın Pyatiqorsk şəhərində “Maşuk-2019” Şimali Qafqaz Gənclər Forumu öz işinə başlayıb.
Forum çərçivəsində Ermənistanın Rusiyadakı səfirinin tədbir iştirakçıları ilə keçirilən görüşü zamanı o, Azərbaycana, ölkəmizin suverenliyinə və ərazi bütövlüyünə qarşı yolverilməz fikirlər səsləndirib ki, bu da Forumda iştirak edən “Gənclərin Bakı klubu” ictimai birliyinin sədri Sabir Rüstəmovun haqlı etirazına səbəb olub və xoşagəlməz insident baş verib.
Bununla bağlı S.Rüstəmov səfirliyə müraciət ünvanlayaraq hadisənin mahiyyətini açıqlayıb və səfirlikdən dəstək istəyib. Məsələnin ciddiliyini, Azərbaycan ictimaiyyətində doğurduğu əks-sədanı nəzərə alaraq, səfirlik Rusiyanın Xarici İşlər Nazirliyinə rəsmi nota ünvanlayıb.
Bundan əlavə, səfir Polad Bülbüloğlu, daha öncə əldə olunmuş razılığa baxmayaraq, Pyatiqorsk şəhərinə səfərdən, yuxarıda qeyd olunan Forumda iştirakdan və planlaşdırılmış görüşlərdən imtina edib.
“Fikirlərimin haqlı olduğu zaman-zaman özünü göstərəcək…”
Böyük Quruluş Partiyasının sədri, deputat Fazil Mustafa Qurban bayramından öncə İranın Azərbaycandakı səfiri Cavad Cahangirzadə ilə görüşüb. Görüş səfirin dəvəti ilə baş tutub. F.Mustafanın Şah İsmayıl Xətai adına medalın ləğv edilməsi barədə çağırışından sonra yaranan qalmaqalın getdiyi günlərə təsadüf etməsi kifayət qədər maraq doğurub. Deputatla görüşün detalları barədə söhbət etdik.
– Fazil bəy, səfir tərəfindən görüş dəvəti sizin üçün gözlənilməz olmadı?
– Xeyr. İran səfiri kifayət qədər istiqanlı, səfirlər içərisində diskussiyalara açıq bir şəxsdir. İndiyə qədər ki, İran səfirlərindən fərqli olaraq, Azərbaycan cəmiyyətinə həssaslığı olan, hansısa bir prosesləri açıq şəkildə həyata keçirən səfirdir. Ona görə də bu İran səfirinə qarşı münasibətim normaldır. Özü də çox savadlı insandır. Bölgədəki durumla bağlı açıqlamalarım olmuşdu. Mən sırf Azərbaycan maraqlarından bu problemə yanaşıram. Hesab edirəm ki, hər hansı bir şəkildə bölgədə gərginliyin artmasından ən böyük ziyanı biz çəkə bilərik. Olası bir müharibə təhlükəsində Azərbaycan qaçqınlar problemi, iqtisadi çətinliklər yaşaya bilər. Təsəvvür edin ki, yolun bağlanması Naxçıvanla əlaqədə yaşayacağımız problemi, gediş-gəlişdə nə qədər problemlər yaşayacağımızı indidən proqnozlaşdırmağa əsas verir. Səfirlə daha çox bu istiqamətlərdə söhbətimiz oldu.
Azərbaycan cəmiyyətində insanlar anlamalıdırlar ki, bizim, ümumiyyətlə, hər hansı bir dövlətə qarşı düşmənçiliyimiz yoxdur. Ölkəmizdə zehniyyətə qarşı çıxış edərkən konkret dövləti suçlamırıq. Biz öz vətəndaşlarımızın problemi kimi məsələyə baxırıq. Məsələn, İran olimpiadada, biri qızıl olmaqla, üç medal qazanırsa, Azərbaycan da qazana bilmirsə, bu bizim üçün düşündürücüdür ki, bizim çox vaxt bəyənmədiyimiz İranın elmi, xüsusilə informatika, riyaziyyat, fizika sahəsinə irəliləyişi bizdən üstündür. Bunun üçün də biz qonşu ölkələrdən nəyisə öyrənməyə çalışmalıyıq. Neqativ məsələlər varsa, bunu da dilə gətirməkdən çəkinməməliyik. Mənim İranla bağlı səsləndirdiyimiz hər hansı bir fikirlər düşmənçilik xarakteri daşımır. İran Ermənistana yardım edir, bu bizim İrana qarşı münasibətimizdə kifayət qədər təsirli rol oynayır. Çünki mənim düşüncəmə görə, İran düşmən ölkəyə yardım etməsə, Azərbaycanla ən yaxın müttəfiq bir qonşu ölkə kimi münasibətlər qura bilər. Bunu hər dəfə görüşlərdə dilə gətiririk. Görüşlərə, fikirlərimizə onların da maraq göstərməsi onu göstərir ki, fikirlərimizi dəyərləndirirlər. Bunun ictimai rəyə təsir göstərdiyini hər halda özləri də söyləyirlər. Bizim əsas məqsədimiz odur ki, Azərbaycan maraqlarının necə qorunması istiqamətində qonşu ölkələrlə əlaqələrimizi daha da inkişaf etdirə bilək. Mənim Türkiyə və digər ölkələrin səfirləri ilə də görüşlərim olur. Rusiya səfirliyinin də tədbirlərində iştirak edirəm. Hər üç ölkənin işçi qrupunun üzvüyəm. Bəzi mətbuat orqanlarında yazılır ki, Fazil Mustafa kimisi hansısa dünyagörüşü müdafiə edən şəxsləri hansısa ölkənin agenti adlandırır. Amma bu qətiyyən belə deyil. Hamını ucdantutma agent adlandıra bilmərəm. Çünki hərənin öz düşüncəsi, dünyagörüşü var. Kimsə fikirlərimizi qəbul etməyə də bilər. Biz öz fikirlərimizi kiminsə düşüncələrini dəyişmək üçün səsləndirmirik. Azərbaycan cəmiyyətində hər doğrunu anındaca qəbul etsəydilər, niyə erməniyə uduzurduq ki? Vaxtilə kimsə Qarabağla bağlı hansısa addımlar atmağı açıq şəkildə söyləyəndə az qala televiziyadan, tribunadan düşürməyə çalışırdılar. Nə olsun? Sonra uduzan kim oldu? Soyuqqanlı şəkildə qaldırılan məsələləri müzakirə etmək lazımdır. Fikir söyləyirəm, kimsə qəbul etməsin. Amma fikirləri top-tüfənglə qarşılamağın adı nədir?
– Xətai ilə bağlı dartışmaların getdiyi günlərə görüş təsadüf etdi. Bu barədə nə deyə bilərsiniz?
– Görüşün bu məsələ ilə bağlı heç bir əlaqəsi yox idi. Açığı, bu mövzuda heç söhbət olmadı. Axı bu mövzu iranlıları maraqlandırmır. İranlıları nə maraqlandırır ki, Azərbaycanda kimsə X əsrdə qalacaq, kimsə də XXI əsrə gedəcək. Əsas müzakirə o oldu ki, bölgədə hansı addımlar atılsın ki, müharibə riskləri olmasın. Bizim üçün də maraqlı idi ki, İranın hansı addımları bu istiqamətdə nəzərdə tutulub.
– Sizin hər zaman anti-şiə mövqedə olduğunuz bildirilir. İran səfiri ilə görüşdə dinlə bağlı fikirləriniz də müzakirə edildimi?
– Mənim anti-şiə mövqeyim yoxdur. Cahillik harada varsa, sadəcə, ona qarşı çıxış edirəm. Şiələrin içərisində kifayət qədər ağıllı, savadlı insanlar var. Onlar mənim dostlarımdır, hətta onlarla ibadət də birlikdə edirəm. Sadəcə, bəzi çevrələr belə fikirlər formalaşdırır ki, guya mən anti-şiə mövqeyindəyəm. Mın cəhalətin ölkədə yayılmasının əleyhinəyəm. Bu cəhaləti təkcə şiə yaymır ki? Əhli-sünnə olanlardan cəhalət yayanların sayı qat-qat çoxdur… Bir PKK-çının Azərbaycan siyasətinə sırıdığı bir nəfər bizi müəyyən təriqətlərə bağlamağa çalışır. Baxırsan ki, adam savadsızdır. Nə olsun ki, Qurandan 30 cild təsfir yazdığını deyir. Ərəb dili, Quran bilicisi olan Fəxrəddin Razi 23 cilddən o tərəfə getməyib. Digərləri də həmçinin. Dində mən heç kimə qarşı deyiləm, nə də kiminləsə dostam. Dində öz anlayışım var. Kimsə qəbul etmirsə, özü bilər. Mən Həsən bəy Zərdabi, Mirzə Cəlil, Axundov və bu tipli digər şəxslərdən daha böyük düşüncə adamı kimi özümü təqdim etmirəm ki? Sadəcə, deyirəm ki, XXI əsrdə də Azərbaycanda heç nə dəyişməyib. Məsələn, bu gün Saleh Məmmədov mənim üçün Novruzəlidir. Onun bir yazısı bunu sübut etdi. İnsanları parta arxasına təzədən otuzdurub, savad verəsi deyilik ki. Açığı, bu tipli məsələlərdə təkrar mübahisə açmağın tərəfdarı deyiləm. Fikirlərimin haqlı olduğu zaman-zaman özünü göstərəcək.
Azərbaycan prezidenti İlham Əliyev və İran lideri Həsən Ruhani arasında telefon danışığı olub.
Modern.az İran prezidentinin saytına istinadən xəbər verir ki, Həsən Ruhani telefon danışığı zamanı Azərbaycanı qardaş ölkə adlandırıb.
“Tehran Azərbaycanla əlaqələrin genişlənməsinə böyük önəm verir. Azərbaycan bizə dost və qardaş ölkədir və əməkdaşlığımız daha da dərinləşəcək”.
Azərbaycan prezidenti isə öz növbəsində iki ölkə arasında münasibətlərin yüksəsk səviyyədə olmasını Bakı və Tehranın atdığı qarşılıqlı addımlarla əlaqələndirib.