 |
 |
Azərbaycanda hava şəraitinin yağıntılı keçməsi ilə əlaqədar olaraq sahələrdən məhsulun kütləvi yığımı ləngiyib.
Oxu.Az xəbər verir ki, bu barədə Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Vüqar Hüseynov bildirib.
O bildirib ki, nazirlik heç bir kənd təsərrüfatı məhsulunun qiymətinin müəyyənləşməsində iştirak etmir:
“Sərbəst bazar iqtisadiyyatında bu, mümkün də deyil. Apardığımız müşahidələrə, araşdırmalarımıza, fermerlərlə söhbətlərdən çıxan nəticələrə gəlincə deməliyəm ki, birincisi, indiyədək sahələrdən əksər hallarda istixana üsulu ilə yetişdirilmiş məhsul yığılıb. Yəni bazarlarda olan bostan-tərəvəz məhsullarının böyük bir qismi istixana məhsullarıdır. Açıq sahə məhsullarının kütləvi yığımı havaların yağıntılı keçməsi ilə əlaqədar hələ başlamayıb.
Bir neçə müddətdir xüsusilə qərb bölgəsində, şimal rayonlarımızda yağıntıların davam etməsi açıq sahələrdən yığımı çətinləşdirir, nəticədə fermer məhsulu yığaraq bazara çıxara bilmir”.
V.Hüseynov qeyd edib ki, yağıntıların azalması ilə məhsulun kütləvi yığımına başlanacaq:
“Bazarda məhsulun bol olması ilə qısa müddətdə qiymətlərin ucuzlaşacağı gözlənilir. Bu ilk hal deyil, yay mövsümündə qiymətlərdə hava şəraiti ilə əlaqədar enib-qalxmalar əvvəllər də qeydə alınıb. Yəni yağıntılarla əlaqədar pomidor gec yetişib, məhsul yığımı azalıb, lakin hava şəraiti normallaşan kimi qısa müddətdə bazarda bolluq yaranıb və qiymətlər ucuzlaşıb”.
Son günlər cəmiyyətdə ən çox müzakirə olunan mövzulardan biri də meyvə-tərəvəzin qiymətinin real dəyərindən baha olmasıdır. Xüsusilə də pomidorun qiymətinin 2 manata yaxın və ya daha yüksək olması insanların ciddi narazılığına səbəb olub. Bu barədə sosial şəbəkələrdə xeyli statuslara rast gəlmək mümkündür. Eyni zamanda mövsümü meyvələrin də qiyməti ötən illə müqayisədə bahadır.
Musavat.com-un reportyor qrupu olaraq meyvə-tərəvəz bazarında olub, qiymətlərin baha olmasının səbəbini satıcılardan öyrənməyə çalışdıq.
Bazarda öyrəndik ki, qiymətlər ötən günlərlə müqayisədə bir qədər ucuzlaşıb. Lakin alıcılar bir o qədər də gözə dəymirdi. Söhbət etdiyimiz alıcılar söylədilər ki, qiymətlərdən narazıdırlar. Bahalıq olduğu üçün normal alış-veriş edə bilmirlər.
Satıcılar isə söylədilər ki, qiymətlərin baha olması onlardan asılı olan səbəblərlə bağlı deyil. Bildirdilər ki, özləri də malı baha qiymətə alırlar. Mal götürdükləri yerlərdə isə qıtlıq yaşanır…
Məsələ ilə bağlı ekspert Mürvət Həsənli Musavat.com-a bildirdi ki, qiymətlərin baha olmasının səbəbi məhsulun az olması ilə bağlıdır. Ekspert bildirdi ki, hazırda bazara çıxarılan məhsul tələbi ödəmir. Ona görə də qiymətlər ötən illərlə müqayisədə bahadır.
Daha ətraflı aşağıdakı video materialdan məlumat ala bilərsiniz.
Azərbaycan Mərkəzi Bankı 15 iyul tarixindən etibarən valyuta məzənnələrini açıqlayıb.
Mərkəzi Bankdan “Qafqazinfo”ya verilən məlumata görə, iyulun 15-nə olan rəsmi məzənnələr bülleteninə əsasən, ABŞ dollarının rəsmi məzənnəsi 1,7000 manat təşkil edir.
Manata nəzərən avronun məzənnəsi 1,9162 manat təşkil edir.
1 türk lirəsi 0,2968 manat, 1 rus rublu 0,0269 manat, 100 İran rialı 0,0040 manat, 1 gürcü larisi isə 0,5985 manatdır.
Rusiya Dövlət Duması Şurasının iclasında Gürcüstan şərab və sularının ölkəyə idxalına qadağa qoyulması məsələsi müzakirə edilib.Duma hökumətə Gürcüstana qarşı sanksiyaların tətbiq edilməsinin məqsədəuyğunluğuna baxılmasını və müvafiq təklifin Prezidentə təqdim edilməsini tövsiyə edib.
Dövlət Dumasının bununla bağlı qəbul etdiyi bəyanatda Gürcüstana tətbiq ediləcək iqtisadi sanksiyaların şərab və qazlı suların idxalına, maliyyə və xarici iqtisadiyyat əməliyyatlarına, turizm fəaliyyətinə və gömrük rüsumlarına aid ola biləcəyi bildirilib.
Rusiya Dövlət Dumasının spikeri Vyaçeslav Volodin isə deyib ki, Rusiyaya hörmətli münasibət naminə şərabdan vaz keçmək olar: “Gürcü şərabını dadmaq imkanım olanda, imtina etmirəm. Lakin, mən, mənim yaxınlarım gürcü şərabı və suları olmadan da keçinə bilərik. Bizim möhtəşəm Rusiya şərablarımız var, sizə tövsiyə edirəm”.
Xatırladaq ki, Dumada məsələ “Vahid Rusiya” fraksiyası tərəfindən qaldırılıb. Prezident Vladimir Putinin bu məsələdə mövqeyinin üst-üstə düşəcəyi təqdirdə, Gürcüstanı ciddi sanksiyalar gözləyə bilər. Qeyd edək ki, bir qədər əvvəl isə Rusiyada ticarət şəbəkələrindən Gürcüstan şərabının piştaxtalardakı payı haqqında məlumat toplanılmasına başlanıldığı haqda xəbərlər mətbuatda yer almışdı. Hazırda gürcü şərabı Rusiya idxalının 17%-ni təşkil edir. Ümumiyyətlə, ötən il Gürcüstanda ixracın səviyyəsi son 30 ildə rekord səviyyəyə çatıb. Dünyanın 53 ölkəsinə 86,2 milyon şüşə şərab ixrac edilib. İxrac edilən şərabın dəyəri 203 milyon dollar olub və bu, 2017-ci ildəki göstəricidən 20% çox olub. Gürcü şərabının ən böyük bazarı Rusiyadır. Sonrakı yerlərdə Ukrayna, Çin, Qazaxıstan, Polşa, Latviya, Belarus, Estoniya, Litva və Almaniya dayanır. Ötən il Azərbaycana da ixrac edilən gürcü şərabının həcmi 40% artıb.
Ekspertlər ehtimal edirlər ki, məhdudiyyət qoyularsa, bu qanunsuz idxalın artması və Gürcüstan şərab müəssisələrinin bir qisminin bağlanması ilə nəticələnə bilər.
Bəs, Gürcüstandan idxalın qadağan olunması Rusiya bazarında Azərbaycan məhsullarına yol aça bilərmi?
İqtisadçı ekspert Akif Nəsirli “Cümhuriyət” qəzetinə açıqlamasında öncə Rusiyanın Gürcüstana tətbiq etdiyi sanksiyanın siyasi məsələ olduğunu xatırladıb: “Azərbaycan Rusiyaya müəyyən şərab məhsulları ixrac edir. Gürcüstanın bazardan çıxarılan payı uğrunda mübarizəyə şübhəsiz ki, digər ölkələr də qoşulacaq. Amma gürcü şərabının brendi var. Bu brend Rusiya bazarında özünə alıcı tapıb. Gürcü şərabı seqmentinin Azərbaycan və ya digər ölkələr tərəfindən doldurulması bir qədər mücərrəd məsələdir. Gürcü şərabının Rusiyaya ixracı o qədər də böyük həcmdə deyil. Düşünürəm ki, gürcü şərabının başqa yollarla Rusiyaya ayaq açması prosesi baş verəcək”.
İqtisadçı bildirir ki, bu prosesin Ermənistan tərəfindən həyata keçirilməsi ehtimalı daha böyükdür: “Əvvəl də Rusiya ilə Gürcüstan arasında bir neçə günlük müharibə baş verən zaman şərabın idxalı qadağan edilmişdi. Lakin erməni sahibkarlar “erməni brendi” adı altında bu şərabın ixracına başladılar. Azərbaycan sahibkarları bazarın o seqmentinə təsir edə bilmədilər, yəni həmin seqmenti doldurmaq üçün hər hansı məhsul təqdim edə bilmədilər. Hesab edirəm ki, indi də şərait dəyişməyəcək. Burada yalnız ermənilərin istifadə etdiyi üsuldan istifadə etməklə uğur qazanmaq mümkündür. Gürcü şərabını “Azərbaycan şərabı” adı altında təqdim etməklə həmin seqmentin bir hissəsini ələ keçirmək mümkündür”.
Bəs, ümumiyyətlə Azərbaycan şərabının ixrac potensialı nə qədərdir?
Ekspert bu sahədə ölkəmizin böyük potensiala malik olduğunu bildirir: “Sovet dönəmində bizim böyük üzüm plantasiyalarımız, onlarla şərab zavodumuz var idi. Lakin, o infrasturuktur məhv edildi. İndi həmin təsərrüfatın yenidən qurulması üçün geniş investitsiyaların qoyuluşuna ehtiyac var. Potensial var, amma bunu realaşdırmaq üçün çoxlu işlər görmək lazımdır”.
Dünya bazarında “Azeri Light” (CIF) markalı neft bahalaşıb.
“APA-Economics”in məlumatına görə, Azərbaycan neftinin 1 barelə olan qiyməti 2,33 ABŞ dolları artaraq 68,11 dollara bərabər olub.
Azərbaycanın əsas soğançılıq bölgələrindən sayılan Beyləqan və Ağdamda baş soğanın kütləvi yığımına başlanılıb.
“Report” xəbər verir ki, bu barədə Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Vüqar Hüseynov məlumat verib.
“Hazırda Ağdamda sahədə soğanın bir kisəsi (33-34 kiloqram) 12 manata, Beyləqanda isə 10 manata təklif olunur. Fermerlər yaxın günlərdə qiymətlərin 5-7 manata qədər düşəcəyini proqnozlaşdırır. Qiymətlərin bu səviyyədən də aşağı olacağı istisna edilmir. Çünki məhsul ötən illərə nisbətən daha çoxdur. Bazarda təklifin artması, məhsulun bolluğu soğanın pərakəndə satış qiymətini də getdikcə azaldır”, – deyə o qeyd edib.
Artıq bir müddətdir ki, ölkədə ciddi internet problemi var.Tez-tez baş verən kəsilmələrdən, saytların, məlumatların gec açılmasından hər kəs şikayətçidir. Son günlərdə “Facebook” sosial şəbəkəsində yaranan problemlər, də bunlara əlavə olunub. Əslində ölkəmizdə, o cümlədən də paytaxt Bakıda internetin sürəti ilə bağlı problemlər təkcə bir neçə günün məsələsi deyil, ümumi problemdir. Rəsmi qurumlar isə bu faktı təkzib etməkdədir.
Nəqliyyat, Rabitə və Yüksək Texnologiyalar Nazirliyndən yerli mətbuata verilən açıqlamaya görə, ölkədə internetin fasilələrlə verilməsi ilə bağlı iddialar həqiqəti əks etdirmir. Fərdi qaydada texniki nasazlığın baş verməsinin ümumilikdə internetin işində problemin yaranması kimi təqdim olunması düzgün hesab olunmur. Hətta müvafiq xəbər saytlarına belə hallara qarşı daha diqqətlə yanaşmaq tövsiyə olunur. Digər tərəfdən təəssüfedici haldır ki, internetlə bağlı ciddi problemlərin mövcudluğu şəraitində vətəndaşlar xidmətlər üçün yüksək məbləğlər ödəmək məcburiyyətində qalırlar.
Azərbaycan Mətbuat Şurasının İdarə Heyətinin üzvü, ekspert Azər Həsrət “Cümhuriyət” qəzetinə açıqlamasında bildirib ki, bir qədər əvvəl internetin sürətində mövcud olan sabitlik artıq tarixə qovuşub:
“Azərbaycanda intenet problemi yoxdur” deyənləri yəqin ki, qara basır. İstər sosial mediyaya baxsaq, istərsə də vətəndaşarı dinləsək, hər kəs internet problemindən danışır. İstər sabit, istərsə də mobil şəbəkə üzərindən internet alanlar şikayətçidirlər. Mən hər ikisindən istifadə edirəm və müşahidə edirəm ki, ikisi də ən adi videonu, şəkli, faylı göndərməkdə belə, çətinlik çəkir, “dirənib, üzümüzə baxır”.
Şəbəkədə sabitlik yoxdur, görüntü kəsilir, gündə bir neçə dəfə yazılı formada qarşımıza çıxır ki, “internet yoxdur”. Niyə yoxdur? Buna hələ ki, heç kim aydınlıq gətirmir. İkinci tərəfdən internetin daşıyıcılığı çox aşağı səviyyədədir. Başqa bir məsələ isə ondan ibarətdir ki, müqavilə üzrə ilə 10 MB interneti provayderlər bizə vermirlər. Başqa sözlə desək, “çəkidə aldadılırıq”. Bunu dəfələrlə ictimailəşdirməyimizə baxmayaraq, xeyri yoxdir. Çünki görünür, bu sahəyə rəhbərlik edən dövlət qurumu - yəni Nəqliyyat, Rabitə və Yüksək Texnologiyalar Nazirliyi bir çəki, düzən verə, qayda-qanun yarada bilmir, ona görə də kim nə bacarırsa, onu da edir. Ölkənin bölgələrində də vəziyyət acınacaqlıdır. Məsələn, mən Xaçmazın Dədəli kəndində tez-tez oluram. Orada “Nar mobitel” telefon rabitəsində heç bir problem olmur. Lakin internetə keçən zaman problem yaranır. Doğrudur, bu özəl şirkətdir, amma bu problem də ümumi internet infrastrukturuna aiddir. Sabit şəbəkəyə, “Aztelekom”, “Baktelekom” üzərindən verilən internetə gəlincə, mən hələ elə bir adam tanımıram ki, onların xidmətindən razılıq etsin”.
Ekspert bir məqamı da xüsusi qeyd etdi:
“Tez-tez cəmiyyət içərisində belə bir xəbər yayılır ki, Nazirliyin birbaşa nəzarətində olan “Aztelekom”, “Baktelekom” özəl provayderlərinin müştərilərini zorla əllərindən alırlar. Bu cür halların mövcudluğu haqda söz-söhbətlər var. Problemin olmadığını deyənlər bir an özlərinə gəlsinlər və bu cür halların niyə baş verməsini izah etsinlər. İkinci tərəfdən isə “problem yoxdur” deyib, yaxalarını kənara çəkməsinlər. Faktiki olaraq hazırda internet infrasturukturu bərbad durumdadır. Azərbaycan işğalçı Ermənistanla informasiya müharibəsinə cəlb edilib, amma təəssüflər olsun ki, internetin zəifliyinə görə çox ciddi problemlərlə üz-üzə qalırıq. Müharibə bir qədər intensivləşərsə, bu məsələdə çətinliklər yaranacaq. Çünki, bizim internetimiz həmin tələblərə cavab vermir”. Azər Həsrət bildirir ki, aktiv istifadəçi olaraq müşahidə etdiyi problemləri dəfələrlə dilə gətirib: “Görünür, müvafiq qurumu istifadəçilərin rəyi maraqlandırmır. Əvvəlki illərdə bir neçə dəfə provayderləri dəyişmişəm ki, bəlkə problem həllini tapar. Amma müşahidə etmişəm ki, fərqli və yüksək xidmət təklif edən provayder mövcud deyil. Bunun səbəbi isə odur ki, həmin provayderlərə internet eyni şəbəkədən verilir və həmin nöqtədən verilən internetdə problemlər olduğundan provayderlər keyfiyyətli xidmət təklif edə bimirlər. Bu internetin normal olmamasının məsuliyyətini isə Nəqliyyat, Rabitə və Yüksək Texnologiyalar Nazirliyi daşıyır. Qurum internetin verilməsinə nəzarət etməli, problemləri araşdırıb, üzə çıxarmalı və həll etməlidir. Amma belə anlaşılır ki, onlar bunu etmirlər.
Etmək istəmirlər, yaxud edə bilmirlər məlum deyil, yəqin ki, öz işini bacarmayanlar bu strukturda toplaşıblar, ona görə də problemləri həll edə bilmirlər. Bu səbəbləri araşdırmaq da dövlətin müvafiq qurumlarının işidir”.
İnternet qiymətlərindən danışan ekspert qiymətlərin qaneedici olmadığını deyir: “Mən ayda 18 manat verib, 10 MB internet alıram. Əvvəlla həmin 10 MB təmin edilmir. İkincisi də təmin edildiyi halda belə, sürətin aşağı enib qalxması müşahidə olunur. Bir çox ölkələrdə internet ucuzdur, bəzi ölkələrdə demək olar ki, pulsuzdur. Bizdə 18 manat internet qiyməti böyük məbləğdir. Estoniya Konstitusiyasında vətəndaşların 1 MB internetlə pulsuz təmin edilməsi konstitusion hüquq olaraq göstərilib. Biz isə 10 MB adı altında 3-5 MB sürətlə internet alırıq. Qiymət yüksəkdir, keyfiyyət və sürət aşağıdır”.
Yenilənmiş 10 manatlıq pul nişanı 18.03.2019-cu il tarixindən tədavülə buraxılmasına baxmayaraq, hələ də əskinasın istifadə olunmasında problem yaşanır.
Minval.info “Yeni Sabah”a istinadən xəbər verir ki, bir çox bankomatlar və ödəmə terminalları hələ də yeni əskinasları tanımadığı üçün istifadəçilər onları banklarda dəyişmək məcburiyyətində qalır.
Yeni pul nişanının məhdudiyyətsiz istifadə olunacağı açıqlansa da, şəhər nəqliyyatını idarə edən sürücülər də onu götürməkdən çəkinir və köhnə 10-luq əskinasları tələb edir.
Problemlə bağlı, Mərkəzi Bankın 2 ay əvvəlki açıqlamasında may ayının sonuna qədər bankomatlarda yeni pul nişanlarına adaptasiya prosesi bitəcəyini qeyd olunmuşdu. Fəqət sakinlər hələ də bununla bağlı əziyyət çəkirlər.
Qeyd edək ki, yenilənmiş 10 manatlıq pul nişanında əsas dizayn elementləri (İçəri şəhərin və Qız qalasının sxematik təsviri, Azərbaycanın xəritəsi və Avropaya inteqrasiya, bir sıra milli xalça naxışları) saxlanılıb.
Mühafizə sistemlərinə gəldikdə isə, mövcud 10 manatlıqdan fərqli olaraq yeni pul nişanında su nişanı kimi Azərbaycanın Dövlət Gerbi təsvir olunub.
Pul nişanının ön tərəfində Qız qalasının təsvirini, hərəkət edən dalğaları və rəngi dəyişən nominalı əks etdirən 3D effektli yeni holoqram (LEAD) yerləşir. Holoqramın müxtəlif hissələrində rəngi dəyişən mini-mətnlər və nominalın rəqəmləri görünür. Eyni zamanda, banknotun ön tərəfində İçəri şəhərin qala divarlarını əks etdirən, rəngi yaşıldan göyə dəyişən, 3D hərəkət və Mərkəzi Bankın dinamik işıq effektləri saçan möcüzəli boya (SPARK LİVE®) yerləşir. Pul nişanının kənarlarında isə görmə qüsuru olan insanlar üçün qabarıq xətlərdən ibarət tanınma elementi əks olunur.
.png "Kapital Bank-ın ilk qalib müştəriləri müəyyən olundu")
Xəbər verdiyimiz kimi, Kapital Bank BirKart müştəriləri üçün stimullaşdırıcı lotereya keçirir. 01 oktyabr 2019-cu il tarixinədək partnyor mağazalar şəbəkəsində BirKart ilə taksit əməliyyatı edən müştərilər lotereyada iştirak edib, qiymətli hədiyyələr qazana bilərlər.
Azərbaycan Respublikasının Qida Təhlükəsizliyi Agentliyi (AQTA) ölkə ərazisində qanunvericiliyin tələbləri çərçivəsində qida təhlükəsizliyinin təmin edilməsi, istehlakçıların hüquqlarının müdafiəsi sahəsində tədbirləri davam etdirir.
AQTA-dan "Ölkə.Az"a verilən məlumata görə, agentliyə Lənkəran, Masallı və Cəlilabad rayonlarında yerləşən, sanitar-gigiyena və texniki normativ sənədlərin tələblərinə əməl etmədən fəaliyyət göstərən süd və süd emalı müəssisələrində qanunsuz yollarla süd məhsullarının- saxta kərə yağının istehsal olunması ilə bağlı məlumat daxil olub.
Daxil olan məlumat əsasında Cəlilabad rayonunun Ocaqlı kəndi, Masallı rayonunun Boradigah qəsəbəsində süd qəbulu və emalı sexlərində, Masallı rayonunun Şərəfə, Viləş və Çaxırlı kəndlərində və Lənkəran şəhərinin Boladi kəndində yerləşən süd qəbulu məntəqələrində reydlər keçirilmiş, xammalın qəbulu və istehsalı sahələrində anti-sanitar vəziyyətin hökm sürdüyü və emal prosesində müxtəlif bitki yağları – marqarin, spred yağlarından istifadə edilərək “nehrə yağı”, “kərə yağı” adları altında qanunsuz yollarla yağların, süd məhsullarının istehsal olunması faktları öz təsdiqini tapmışdır. Yerlərdə aparılan araşdırmalar zamanı qəbul və istehsal müəssisələrində xammalın qəbulu, istehsalı zamanı sanitar-gigiyena və texniki-normativ tələblərin ciddi şəkildə pozulduğu müəyyən olunub.
Aşkar olunan faktlar əsasında aşağıda adları qeyd olunan istehsal və emal müəssisələri ilə bağlı qanunvericilik çərçivəsində tədbirlər həyata keçirilir.
1) Masallı rayonu, Boradigah qəsəbəsində yerləşən Qəniyev Fərhad Allahşükür oğluna məxsus süd qəbulu və emalı sexi
2) Cəlilabad rayonu, Ocaqlı kəndində yerləşən Əsgərov Zakir Vəli oğluna məxsus süd qəbulu və emalı sexi
3) Masallı rayonu, Şərəfə kəndində yerləşən Cəbrayılov Elçin Cabir oğluna məxsus süd qəbulu məntəqəsi
4) Masallı rayonu, Viləş kəndində yerləşən Məmmədov Elmidar Vaqif oğluna məxsus süd qəbulu məntəqəsi
5) Lənkəran şəhəri, Boladi kəndində yerləşən Babayev Xasay Cəbrayıl oğluna məxsus süd qəbulu məntəqəsi
6) Masallı rayonu, Çaxırlı kəndində yerləşən Qədirov Qədir Yarımşah oğluna məxsus süd qəbulu məntəqəsi
Aşkar olunan qanunsuz fəaliyyətlər və onların nəticələri ilə bağlı geniş araşdırmaların aparılması üçün məhsullardan nümunələr götürülərək Azərbaycan Qida Təhlükəsizliyi İnstitutunun müvafiq laboratoriyalarına göndərilib. Araşdırmalar davam etdirilir.